«Бэлисипиэт» кэпсээн долгутта, уйадытта

Соторутааҕыта хаһыаппытыгар уонна саайтпытыгар Наталия Рязанская «Бэлисипиэт» кэпсээнин бэчээттээбиппит. Айымньы үгүс ааҕааччыбытын долгуппут, уйадыппыт. Сорохтор, бэл, харахтарын уута кэлбитин билбэккэ да хаалбыттар. Бу буоллаҕа ааҕааччы сүрэҕин таарыйар, күлүүс кэриэтэ арыйар уус-уран тыл сүдү күүһэ! 
Дьокуускай куорат 12-с №-дээх орто оскуолатын үөрэнээччилэрэ кэпсээни олус сөбүлээбиттэр. Бу туһунан оҕолор бэйэлэрин санааларын аҕыйах этиинэн сурукка тиһэн ыыппыттар. Маладьыастар!  

Наталия Рязанская «Бэлисипиэт» диэн кэпсээнин олус сөбүлээтим. Сорох түгэннэргэ киһи ытыах да курдук суруйар. Мин бу айымньыттан киһи баҕа санаалаах, хараҕа уоттаах буоллаҕына, олоҕо уһуон сөбүн биллим. Куолук күн аайы ыарыытын саныы-саныы сыппыта эбитэ буоллар, уһуо суохтаах эбит.

 Уруйдаана Стручкова,
5 «б» кылаас

«Бэлисипиэт» – киһи дууһатын арыйар бэртээхэй айымньы. Кэпсээн саҕаланыытыгар ыаллара Марыына дохсун ардах тыаһыттан уһуктуутунан ааптар биһигини туох эрэ алдьархай буолуохтааҕар бэлэмниир курдук. Оттон кэпсээнин эмиэ Марыынанан бүтэрбитин мин маннык  толкуйдаатым: ыалларгытыныын чугас буолуҥ, көмөлөсүһүҥ, кинилэр кыһалҕаларын кыһалҕа оҥостуҥ диэн ааптар сүбэлээбит эбит.

Айыына Ермолаева,
11  «б» кылаас

Мин бастаан Баһыыгы уол өлүүтүгэр буруйдуу санаабытым. Кини тойон-тойон курдук бэлэм оҥоһуллубут бэлисипиэти илдьэ барбытыттан маҥнай кыыһырбытым. Онтон кэпсээн кэннин ааҕан баран, бэлисипиэти аҕалан быраатын уҥуоҕар уурбутуттан буруйун билиммит диэн өйдөөтүм. Суобаһа төһө эрэ оонньоото, эрэйдэннэ диэн аһынным.

Ярик Мандаров,
11  «б» кылаас

Наталия Рязанская «Бэлисипиэт» диэн биһиги саастыы ыарыһах уол кылгас олоҕун туһунан кэпсээнин наһаа сөбүлээн аахтым. Айымньыга олоххо тардыһыы, баҕа санаа туолуутун уонна киһи кыраттан үөрэрэ эбэтэр уостара көстөр.

Мин маннык толкуйдаатым: бэлисипиэти убайа тиэйэн илдьэ барбатаҕа буоллар, Куолук тыыннаах хаалыа этэ дуо? Мин санаабар, кини ыарыыта олус ыарахан. Арай аҕыйах күн уһуо эбитэ буолуо.

Бу кэпсээн чугас дьоҥҥор, доҕотторгор үчүгэйдик сыһыаннас, кырдьаҕас уонна ыарыһах дьоҥҥо болҕомтолоох буол диэн үөрэтэр. 

Артур Свинобоев,
5 «в» кылаас

Ааптар ардаҕы уһун ыарыы, эрэйдэнии бэлиэтин курдук киллэрбит быһыылаах. Кэпсээҥҥэ тыа сирин олоҕо, күннээҕи кыһалҕата ойууламмыт: от үлэтэ, оҕолор оонньооһуннара. Даайаны наһаа аһынным, быраатын өлүүтүгэр бэйэтин буруйдана санаата. Дьиҥэ, саамай оҕону таптааччы кини буоллаҕа дии.

Айтал Ксенофонтов,
11  «б» кылаас

Мин бу кэпсээнтэн киһи баҕа санаата хайдах курдук күүстээҕин сөхтүм. Кыра уолчаан чугас дьонугар улаханнык ыалдьарын да биллэрбэтэх. Дэриэбинэ дьоно ким да Куолук бачча түргэнник өлүөхтээҕин билбэтэх, оҕону олус аһыйдылар. Дьоно оҕолорун олус таптыыллара, харыстыыллара наһаа итэҕэтиилээхтик суруллубут. Хомойуох иһин, ыарыыны кыайбаккын!

Уйгун Копырин,  
5 «в» кылаас

Бу кэпсээни ааҕан баран, киһи үөрдэҕинэ, баҕа санаата туоллаҕына, олоҕо да уһуур эбит диэн түмүккэ кэллим. Олоххо хас биирдии киһи тугу оҥороро улахан оруолу оонньуур. Үтүө быһыыны оҥордоххо, хайдах да ыараханнык ыалдьар киһи олоҕун уһатыахха сөп эбит.

Диана Неустроева,
5 «б» кылаас