Белинскэй уулуссатын хапытаалынай өрөмүөнэ түмүктэнэн эрэр

От ыйын 1 күнүнээҕи туругунан Белинскэй аатынан уулусса Октябрьскай уулуссаттан Петровскай уулуссатыгар диэри кэрчигин хапытаалынай өрөмүөнэ түмүктэнэн эрэр.
Ол туһунан куорат баһылыга Евгений Григорьев кыттыылаах «Главстрой» МХТ көһө сылдьар мунньаҕа быһаарда. Санатар буоллахха, бу уулусса өрөмүөнэ «Олох инфраструктурата» нацбырайыагынан ыытыллар.

Куорат баһылыга Евгений Григорьев бэлиэтээбитинэн, куорат уулуссаларыгар ыытыллар суол өрөмүөнэ сүрүннээн график быһыытынан, сорох сирдэргэ урутаан барар. «Главстрой» МХТ салайааччыта Афанасий Александров Белинскэй уулуссатын аспаалын аллараа араҥатын ууруу 95% түмүктэммитин, үөһээ араҥатын ууруу 20% тэҥнэспитин иһитиннэрдэ.
«Сахатрасстрой» бэдэрээттээх тэрилтэ бу күннэргэ уу халдьаларын, турбаларын тардыынан, тротуар, бордюр оҥоруутунан дьарыктанар. 
Эбийиэк уопсай уһуна 484 миэтэрэ.
Санатар буоллахха, быйыл «Олох инфраструктурата» нацбырайыагынан Дьокуускай куоракка 11 эбийиэккэ 15 км усталаах сиргэ үлэ барар, диэн Олохтоох дьаһалта пресс-сулууспата иһитиннэрэр.