Бэлиэ кинигэ сүрэхтэниитигэр ыҥыраллар

“Арчы Дьиэтин” иһинэн үлэлиир  “Сандаар” диэн айылҕалаахтар  түмсүүлэрэ төрүттэммитэ быйыл лоп курдук 20 сыла туолар. Бу бэлиэ күҥҥэ сыһыаран, “Айар” кинигэ кыһата  ааҕааччы киэҥ араҥатыгар анаммыт “Айыылартан айдарыылаахтар, өбүгэлэртэн көҥүллээхтэр” диэн олус интэриэһинэй кинигэни бэчээттээн таһаарда.

Аата да ыйа сылдьарын курдук бу кинигэҕэ норуоттан тахсыбыт, биһиги кэммит эмчиттэрин, ичээннэрин, отоһуттарын, илбииһиттэрин, алгысчыттарын, уйулҕаһыттарын уонна билгэһиттэрин тустарынан  араас кэмҥэ суруллубут суруйуулар түмүллэн киирбиттэр. Хомуурунньук ааптара –  РФ Суруналыыстарын сойууһун чилиэнэ Г.И. Байгильдина-Ороһуунускайа.

Кинигэ сүрэхтэниитэ бу дьыл муус устар 16 күнүгэр киэһэ 17:00 чааска  “Арчы Дьиэтэ” Айылгы киинигэр ыытыллар. Сиэр-туом уонна алгыс буолуоҕа. Айылҕаттан айдарыылаахтар санааҕытын көнньүөрдэн, олоххут саҥа, сырдык суолун тэлэргитигэр көмөлөһөр алгыстаах сүбэлэри биэриэхтэрэ, сиэр-туом толоруохтара. Автограф-сиэссийэ, кинигэ атыыта тэриллиэ. Киириитэ босхо.

“Арчы Дьиэтин” аадырыһа: Дьокуускай куорат, Чернышевскай аатынан уул. 24 дь.