Бэлиэ күннэри – арыгыта суох

Билии бырааһынньыгар уонна Куорат күнүгэр, чуолаан балаҕан ыйын 1 уонна балаҕан ыйын 14 күннэригэр Дьокуускай куорат территориятыгар арыгы атыыта бобуллар.
Балаҕан ыйын 1 күнүгэр 00:00 чаастан 23:59 чааска, ону сэргэ балаҕан ыйын 14 күнүгэр 00:00 чаастан 23:59 чааска диэри арыгыны биирдиилээн атыылааһыны бобор туһунан дьаһалы куорат баһылыга Евгений Григорьев атырдьах ыйын 25 күнүгэр баттаата.
Докумуоҥҥа этиллэринэн, бобуу уопсастыбаннай бэрээдэги хааччыйар уонна террористическай куттал суох буолуутун сэрэтэр сыаллаах.
Бэлиэтээн эттэххэ, быйылгы Куорат күнүгэр салют ытыллыбат, Арассыыйа эстрадатын сулустарын кэнсиэрэ былааннаммат. Куорат 5 былаһааккатыгар балаҕан ыйын 8-14 күннэригэр 40-тан тахса араас хабааннаах тэрээһин ыытыллыаҕа, Иван Крафт, Петр Бекетов, Семен Дежнев пааматынньыктарыгар сибэкки дьөрбөтө ууруллуоҕа, диэн Олохтоох дьаһалта пресс-сулууспата иһитиннэрэр.