Бэлэмнэммит сир 65 бырыһыана түҥэтиллибит

Ол эбэтэр, күн бүгүн бу сыалга анаан бэлэмнэммит учаастактан 65,9 %-на бэлиэр түҥэтиллэн турар. Ол иһигэр 341 учаастак — Табаҕаҕа, 579 учаастак —Тулагы Киллэмҥэ. 

Сир сыһыаннаһыыларыгар ааҕыныстыба начаалынньыга Сергей Тимошенко этэринэн, хаалбыт 476 учаастактан 93- һэ Табаҕаҕа баар, уоннааҕы хаалбыта —  Тулагы Киллэмҥэ.

Санатан эттэххэ,  СВО кыттыылааҕа эбэтэр кини дьиэ кэргэнин бэрэстэбиитэлэ ананыахтаах  учаастагын сэрэбиэй быһыытынан бэйэтэ талан ылар. Остуолга тэлгэммит, таһыттан көрдөххө, үүт-үкчү файл-папкалартан сөбүлүү көрбүтүн талар. Ону астаҕына, дьэ ханнык сиргэ, хаһыс учаастак тиксибитэ биллэр. Ааҕыныстыба үлэһиттэрэ ону боротокуолга киллэрэн, бэлиэтээн иһэллэр. 

Табыгастаах уонна өйдөнүмтүө буоллун диэн, паапка иһигэр сир учаастагын хайдах быһыылаахтык бэйэ аатыгар суруйтарар, туох докумуон толорулларын, бастаан туохтан, хайдах саҕалыыр наадатын туһунан сиһилии ыйынньык (памятка) угуллар.  

Холобур, кэнники сири түҥэтии бу дьыл тохсунньу 30 күнүгэр буолан ааста. Бу күн учуокка 2024 сыл от ыйын 1-22 күннэригэр турбут 50 киһини ыҥырбыттарыттан 46 киһи кэлбит. Ону таһынан иннинээҕи түҥэтиигэ кыайан кэлбэтэх 12 киһи эбиллибит. Инньэ гынан жеребьевкаҕа 58 учаастак талыллыбыт. Итинтэн Табаҕаҕа -18, Тулагы Киллэмҥэ - 40 учаастак  түбэспит.