Бегония сибэккини көрүү-истии уратылара

Буора

Бегония сымнаҕас, салгын оонньуур, көпсөркөй буору сөбүлүүр. Ол эрээри, уопуттаах сибэккиһиттэр сүбэлииллэринэн, сибэккилиир, кыраһыабай сэбирдэхтээх, хортуоппуйдаах бегониялар бары буорга тус-туһунан ирдэбиллээхтэр.

Сырдыкка наадыйыыта

Бегония үксэ сырдыгы сөбүлүүр, ол эрээри күн сыралҕаныттан куттанар. Сорох көрүҥнэр букатын да күлүк сири ордороллор. Саха сиригэр кэлиҥҥи кэмҥэ үөдүйэн эрэр Элатиор көрүҥ биир уратылаах. Кини күн уһуна 9 чааска диэри кылгаатаҕына эрэ, ол эбэтэр кыһыҥҥы кэмҥэ сибэккилиир. Оттон ханнык баҕар бегония сибэккилиир кэмигэр миэстэтин уларытары сүбэлээбэт эбит.

Салгын сиигэ

Дьиэ салгына сөбүгэр сииктээх буолуохтаах. Онон маннык сибэккини үүннэриэхтэрин баҕарар дьон эрдэттэн салгыны сиигирдэр тэрили хааччыныахтарын наада. Ол кыаллыбат түгэнигэр, иһиттээх сибэккини керамзиттаах, өрүс таастаах, муохтаах дуу поддоҥҥа эбэтэр уулаах иһит таһыгар туруорары сүбэлииллэр.

Уу кутуута

Бегония буора куруук сииктээх буолуохтаах, сорох сибэккилэр курдук хаһан да хам хатарыллыа суохтаах. Биирдэ эмэ уутугар лимон кислотатын эбэн, буорун тууһун үмүрүтүөххэ сөп эбит. Оттон уоҕурдууну убаҕаһы эрэ туттарга сүбэлииллэр. Сибэккитин кээмэйэ кыччыыр, доруобай да сэбирдэхтэрэ таммалыыр, бутоннара тахсан иһэн өлөр буоллахтарына, ол аата бегония аһатыыга наадайар. Аны туран, бегония суукка биир эрэ кэмигэр, сарсыарда эрэ уу кутары сөбүлүүр эбит.

Болҕойуҥ: Бегонияны уунан ыстарар бобуллар!

Быһыытын оҥоруу

Ыал түннүгэр дуу, маҕаһыын долбууругар дуу дьоп-дьоҕус, төп-төкүнүк сибэккилэргэ ымсыырарбыт баар суол. Бу аата кинилэр быһыыларын-таһааларын быһан-отон, кырыйан биэрбиттэр. Сибэккилиир бегонияны сибэккилээн бүппүтүн кэннэ кырыйаллар эбит. Сорох сибэккиһиттэр силиһигэр диэри бүтүннүү кырыйар ньыманы тутталлар.

Ууһатыы

Бегонияны умнаһынан, хортуоппуйунан, сэбирдэҕинэн, сиэмэнэн  даҕаны ууһатыахха сөп. Ол эрээри бу сибэкки уһуннук силис тартарарын тулуйуохха наада.