Бэбиэскэни аахайбатаххына, бөдөҥ ыстараапка түбэһиэххин сөп

“Өскөтүн киһи военкоматка ыйыллыбыт кэмигэр кэлбэтэҕинэ уонна дакаастанан турар сөптөөх төрүөтэ суох буоллаҕына, 10 000-тан 30 000 солкуобайга диэри ыстарааптаныан сөп. Бу РФ административнай быраабы кэһии туһунан кодексатын 21.5 ыстатыйатыгар ыйыллар”, - диэн сэрэттэ Москватааҕы юридическай корпорация юриһа Вячеслав Печников.

Ол гынан, бу ыстараабынан эрэ муҥурдаммат. Бэбиэскэ Биир кэлим реестргэ киллэриллибитин кэннэ, военкоматка кэлбэтэх гражданнар Арассыыйаттан тахсаллара бобуллар.

Ону тэҥэ, бэбиэскэҕэ ыйыллыбыт күнтэн 20 күн иһигэр военкоматка кэлбэтэххэ, ИП быһыытынан регистрацияны ааһарга бобууну көрсүөххэ сөп. Өссө бэйэ дьарыктаах буолууга регистрацияланыыга ыарахаттары үөскэтиэн, ону тэҥэ массыынаны ыытыыга, тиэхиньикэни регистрациялааһыҥҥа, дьиэ-уот атыытыгар уонна кирэдьиит ылыыга хааччахтааһыннарга тириэрдиэн сөп.

Холуобунай эппиэтинэс эмиэ сүктэриллэр.

“Кэлбэтиҥ да, холуобунай дьыала тэриллэр диэн буолбатах. Оттон ыҥырыыттан куотуна сырыттахха, Арассыыйа Холуобунай кодексатын 328 ыстатыйата туттуллуон сөп. Бу ыстатыйанан ыстараап 200 тыһыынча солкуобайга диэри тиийиэн, күһэлэҥ үлэ, тутуллуу эбэтэр икки сылга диэри хаайыыга барыахха сөп,” — диэн юрист этэр.

Өскөтүн аармыйаҕа ыҥырыллыбыт киһи ыалдьар, дьиэ кэргэнигэр кыһалҕалаах эбэтэр атын биричиинэ баар буоллаҕына, тута бигэргэтэр докумуоннары хомуйуу улахан суолталаах. Ыстараап төрүөтэ суох оҥоһуллубут буоллаҕына, утарсыахха сөп.