Байыастарга көмө тиһигин быспат

СӨ «СПИД уонна сыстыганнаах ыарыылары сэрэтии киинэ» байыастарга көмөлөһөр үлэтин салгыы ыытар.

Ол курдук бу соторутааҕыта өрөспүүбүлүкэтээҕи уопсастыбаннай тэрилтэ «Шторм» анал этэрээт байыастарын өйүүргэ этии киллэрбитэ. Киин кэлэктиибэ дойдуну көмүскээччилэр көмөҕө наадыйалларын истээт, тута өйүүргэ туруммута. Кылгас кэм иһигэр антибиотиктары, бааһы ыраастыыр, ыарыыны мүлүрүтэр уо.д.а. тыын суолталаах медицинскэй сириэстибэлэри бэлэмнээбитэ. «Биһиэхэ, медицина үлэһиттэригэр, дойдуну көмүскээччилэргэ көмөлөһүү көннөрү үтүө быһыы эрэ буолбакка, идэбитинэн да, киһилии сиэринэн да ытык иэспит буолар. Байыастарбыт иннигэр туох эппиэтинэс турарын толору өйдүүбүт уонна кинилэр доруобуйалара этэҥҥэ буоларын өйүүргэ тугу кыайарбытынан көмөлөһүөхпүт», – диэн СӨ СПИД уонна сыстыганнаах ыарыылары сэрэтии киинин кылаабынай бырааһа Александра Григорьевна Золотарева бэлиэтээн этэр.

Бу тириэрдиллибит эмп-томп аҕыйах хонугунан анал байыаннай дьайыы буола турар сиригэр ыытыллыаҕа. Бэлиэтиир буоллахха, киин кэлэктиибэ маны таһынан соторутааҕыта инники кирбии байыастарын «Патриот» УАЗ массыынанан хааччыйарга көмөлөһөн турар.

Хаартыска: СӨ СПИД уонна сыстыганнаах ыарыылары сэрэтии киинин телеграм-ханаалыттан