Байыаннай медиктэр ааттарын үйэтитэргэ саҥа бырайыак

РФ доруобуйа харыстабылын министиэристибэтэ Аҕа дойду Улуу сэриитигэр Кыайыы 80 сылын көрсө РФ доруобуйа харыстабылын иһитиннэрэр уонна тэрийэр киин институтун кытта «Медсанбат» диэн медиктэр сэрии сылларыгар көрдөрбүт хорсун быһыыларын сырдатар бырайыагы саҕалаабытын иһитиннэрэр.

Бырайыак сэрии сылларыгар бэйэни харыстаммакка хас биирдии сэбиэскэй саллаат олоҕун иһин охсуспут, медицинскэй көмөнү оҥорон дьоруойдуу үлэлээбит медиктэргэ ананар.

Кинилэр сыралаах үлэлэринэн хас да уонунан тыһыынча буойун тыынын өрүһүйэннэр, Кыайыыны ситиһэргэ көмөлөспүттэрэ.

Сэрии сылларыгар сэбиэскэй медицинаҕа 500 тыһ. кэриҥэ исписэлиис үлэлээбитэ: 140 тыһ. кэриҥэ быраас, 228 тыһ. тахса сиэстэрэ. Онтон үгүстэрэ мобилизацияламмыттара, 100-тэн тахса тыһ. медик, кадровай байыаннай быраастары, санитарнай подразделение үлэһиттэрин киллэрэн туран, уоттаах сэрии инники кирбиитигэр сылдьыбыттара биллэр.

«Медсанбат» бырайыак бу медицина фронугар олоххо куттал суоһуурун аахсыбакка күннэтэ хорсун быһыыны көрдөрбүт үтүө дьон аатын үйэтитэргэ туһуланар. Ол курдук, бырайыак саайтыгар байыаннай кэмнээҕи медицина уонна байыаннай медиктэр историяларын кэпсиир матырыйааллар сырдатыллыахтара.

Хас биирдии киһи Аҕа дойду Улуу сэриитигэр медицинскэй подразделениеҕа үлэлээбит аймаҕын туһунан сибидиэнньэни бу бырайыак саайтыгар киллэрэн үйэтитэр кыахтаах. Онно «Медсанбат» https://medsanbat.mednet.ru/ саайтка киирэн анкетаны толороро, кэпсиир аймаҕын хаартыскатын угара эрэ ирдэнэр.