Бастыҥ үөрэнээччилэр — Ил Дархан Харыйатыгар

Ахсынньы 20 күнүгэр Дьокуускай куоракка үгэс буолбут Ил Дархан Харыйата буолла. Манна үөрэххэ, наукаҕа, айар үлэҕэ уонна спорка үрдүк ситиһиилэммит үөрэнээччилэр, олимпиадалар кыайыылаахтара, призердара араас улуустартан муһуннулар.

Билсиҥ, сэргээҥ, Арктика бастыҥ үөрэнээччилэрин:

Виолетта Винокурова – Анаабыр улууһун Сааскылаах орто оскуолатын 11-с кылааһын туйгун үөрэнээччитэ.

– Биһиги улуустан биэс буоламмыт – Максим Макаров, Регина Спиридонова, Егор Туприн, Максим Ксенофонтов уонна мин – кэлэн кытынныбыт. Бу Харыйаҕа кыттыыны биһиги, ыраах улууска олорор оҕолор, сыал-сорук оҥостон ситиһэбит диэхпин сөп. Ол курдук, мин 10-с кылаастан туйгуннук үөрэнэбин. Ону таһынан научнай конференцияҕа түмүктэрбинэн, спорка ситиһиилэрбинэн кыттыыны ылар чиэстэнним. Түгэнинэн туһанан Сааскылаах – Дьокуускай айаммыт төлөбүрүн 30%-нын уйунан ыыппыт оскуолабар махтанабын. Бу бэйэтэ Саҥа дьыл иннинээҕи бэлэх курдук буолла. Ол курдук, Анаабыртан Дьокуускайга биир хайысхаҕа сөмөлүөт билиэтин сыаната 55 000 солк. буолар.

Билиҥҥи баҕа санаам диэн, хаайтарбакка, түргэнник Сааскылаахпар тиийэммин, Саҥа дьылы дьиэбэр ылыахпын баҕарабын. Уонна быйылгы 11-тэргэ барыларыгар эксээмэннэрин үрдүк баалга туттаралларыгар баҕарабын.

Сандал Слепцов – Орто Халыма улууһун Василий Александрович Местников аатынан Алаһыай орто оскуолатын 11-с кылааһын үөрэнээччитэ, Арассыыйатааҕы «Инникигэ хардыы» конференция кыттыылааҕа.

– Мин 2022 сыллаахха үлэҕэ киирбит саҥа, киэҥ-куоҥ, сып-сырдык оскуолабынан киэн туттабын. Биһигини элбэххэ угуйар, сирдиир, саҥа технологиянан, методиканан үөрэтэр учууталлардаахпын. Ил Дархан Харыйатыгар Орто Халыма улууһуттан 11 буолан кэллибит. Мин быйыл «Инникигэ хардыы» өрөспүүбүлүкэтээҕи научнай-чинчийэр конференцияҕа күн-дьыл туругун уонна климат туһунан бырайыакпынан 1-кы миэстэни ылары ситиспитим. Салайааччым Ольга Афанасьевна Потапова. Спорду өрө тутабын. Дуобакка, саахымакка, ону тэҥэ волейболга, ытыыга наар миэстэлэһэбин. Нэһилиэгим чиэһин көмүскүүбүн. Кыралаан хоһоон суруйарга холонобун уонна буолар кэнсиэртэргэ актыыбынайдык кыттабын. Бу барыта үөрэхпин уонна дьарыкпын, ону сэргэ дьиэҕэ-уокка, хаһаайыстыбаҕа эбээһинэспин дьүөрэлээн, бириэмэбин сөптөөхтүк аттарарбыттан тахсар.

Мин төрөөбүт дойдум Алаһыай Орто Халыма куораттан 140 км тэйиччи. Сиринэн суол кыһын эрэ баар, массыынанан түөрт-биэс чааһынан тиийэҕин, буранынан – сэттэ-аҕыс чаас айан. Дьыл атын кэмигэр сөмөлүөт эрэ сылдьар. Дьокуускайга диэри сөмөлүөтүнэн көтөр билиэт сыаната 48 000 солк.

Ил Дархан Харыйатыгар кэлэр-барар бырайыаспытын уонна манна «Сосновай бор” лааҕырга олорор ороскуоппутун улууспут уйунна. Түгэнинэн туһанан улууспут аҕа баһылыга И.В. Лаптевка, Дьокуускайга бүөбэйдээн илдьэ сылдьыбыт Ойуһардаах оскуолатын учуутала Е.Н. Винокуроваҕа ис сүрэхтэн махтанабын. Махтанабын тапталлаах төрөппүттэрбэр, аймахтарбар. Кылааһым салайааччыта О.А. Потаповаҕа, үөрэнэр оскуолам бука бары учууталларыгар.

Мин бу Ил Дархан Харыйатыгар кэлэммин саҥа доҕоттордоннум. Инники олохпор өссө мотивация ыллым.

Олохпутугар хаһан да умнуллубат, дьоллоох оҕо сааспыт Харыйатын, кэрэ күлүмүрдэс күннэрин бэлэхтээтигит. Эһиги үтүөҕүтүн түһэн биэрбэккэ, инники күөҥҥэ хардыылаан иһиэхпит.

Кэлээри турар 2026 сыл Сахабыт сирин бука бары олохтоохторугар дьол-үөрүү түгэннэринэн баай буоллун. Сахабыт сирэ үүнэ-сайда, чэчирии турдун!

Хаартыскалар: Дьоруойдар тиксэриилэрэ