Бастыҥ банкет: оскуолаҕар дуу, барнхауска дуу?

«Биһиги спорт саалатыгар банкеттаабыппыт, өлөн-быстан биэрбэккэ сылдьабыт. Бастыҥ банкет – бэйэҥ оскуолаҕар, оскуолаҥ спорт саалатыгар», – диэн санаатын үллэстэр Паша Егорова бобуулаах ситимҥэ.

Чахчы, урукку оҕолор банкеттара спорт саалатыгар үөрүүлээх быһыыга-майгыга ааһара, төрөппүттэр толору астаах остуол тардаллара. Сорохтор походтуу, айылҕаҕа хоно тахсаллара, оонньуу оройуттан тутуллара, кутаа тула ырыа-тойук дьиэрэйэрэ. Хата, кимнээҕэр истиҥ, иһирэх тэрээһин буолара.

Оттон билигин хайдаҕый? Паша Егорова этэринэн, билиҥҥи төрөппүттэр аска, «сулустарга», тамадаҕа, ди-джейгэ, оҕо биир киэһэ кэтэр көстүүмүгэр, былаачыйатыгар харчыларын кэрэйбэттэр.

«Кыыс буоллаҕына, икки былаачыйа, өссө макияж, бүрүчүөскэ, айуу, айа. Чэ, 11-с кылаас кэнниттэн диэн өйдөнөр. Тохсус, төрдүс кылаас... бүтүҥҥүтүүй, баһаалыста», – диир кини.

«Банкекка барыахтаах харчыгытынан оҕолоргутугар курутуой төлөпүөннэ эбэтэр ноутбукта, планшетта ылан биэриҥ, ол ордук буолуоҕа», – диэн сүбэлиир.

Бу диэн эттэххэ, ити испииһэк өссө кыра ээ. Холобур, манна кыргыттар кыламан, тыҥырах оҥортороллоро ааттамматах. Аны итиннэ фотограф, видеограф өҥөтө, кылааһынан альбом үлэһии, эрэстэрээн, киэһэ өттүгэр барнхаус куортама, теплоходунан устуу уо.д.а. киириэҕэ. Бэлэххэ-туһахха, бириискэ балачча харчы барарын умнумаҥ. Үөрүүлээх күн минньигэс торда суох ааспата чуолкай. Бытархай, ол эрээри испииһэги хаҥатар ороскуот онтон да элбэх буоллаҕа. Оттон сыана туохха барытыгар күн-түүн «саллайа» турар...

***

Мантан саас банкет бөҕө ньиргийиэҕэ... Бу тиэмэ сыл аайы күөрэйэр да, күрэхтэһэ-күрэхтэһэ бырааһынньыктыыр муода өтөрүнэн ааһыа биллибэт.