Бастрыкин выпускниктар маассабай сүһүрүүлэрин хонтуруолга ылла

Куттал суох буолуутун ирдэбилигэр эппиэттээбэт өҥөнү оҥоруу иһин холуобунай дьыала көбүтүлүннэ.

Бу туһунан бэс ыйын 30 күнүгэр Силиэстийэлиир кэмитиэт MAХ ханаалыгар биллэрдэ. Банкет кэнниттэн 14 киһини балыыһаҕа киллэрбиттэр, олортон 9-һа оскуола оҕото уонна 5-һэ улахан киһи. Барыларыгар ис инфекциятын сибикитэ баар, туруктарын орто ыарахан диэн сыаналыыллар. Эмчиттэр эмсэҕэлээбиттэртэн анаалыс ылбыттар — түмүгэ өссө да күүтүллэр.

Бастрыкин эрэгийиэннээҕи силиэстийэлиир кэмитиэт баһылыга Виталий Кондратенкоҕа силиэстийэ хаамыытын уонна сүһүрүү төрүөттэрин туһунан отчуоттуурга сорудахтаата. Эмсэҕэлээбиттэр бары Мииринэйдээҕи киин балыыһаҕа бэс ыйын 29 күнүгэр тиийбиттэр, ол күн кинилэри стационарга киллэрбиттэр. Ону тэҥэ, өрөспүүбүлүкэ прокурора Сергей Дябкин дьыаланан дьарыктанар — биэдэмистибэ бэрэбиэркэни саҕалаата.