Бастакы паромнар хаһааҥҥыттан сылдьыахтарай?

Дьокуускай – Аллараа Бэстээх хайысханан бастакы тэхиньиичэскэй рейси бу нэдиэлэ бүтүүтэ оҥоруохтарын сөп. Ол эрээри балаһыанньа муус барыыта хайдах буоларыттан тутулуктаах. Бу туһунан СИА-ҕа «Саха сирин паромнара» тэрилтэ салайааччыта Николай Ефимов иһитиннэрдэ.

Кини этэринэн, тырааныспары туоратыы тарыыба үрдүүрэ күүтүллэр, бу уларыйыы пассажирдарга сыһыана суох.

«Бэҕэһээ уу таһыма үрдүк этэ, бүгүҥҥү туругунан 20 см түстэ. Массыыналар парому күүтэр сирдэрин уу ылбыта. Уу түһэрин уонна кыратык куурарын кэтэһэбит, оччоҕуна инженернэй тутууну таҥан саҕалыахпыт. Аны Даркылаахха дьиэлэр ууга барбыттарыгар, уоту араарбыттара, ол үлэни эмиэ атахтыыр. Бу нэдиэлэ бүтүүтэ бастакы тэхиньиичэскэй рейстэри оҥоруохпут диэн эрэнэбин», – диэтэ Ефимов.

«Саха сирин паромнара» тэрилтэ салайааччыта иһитиннэрбитинэн, бу күннэргэ причаллары ыраастааһын үлэтин саҕалыахтара. Билигин докумуон үлэтэ бара турар.

Ол курдук, билигин СӨ Сыана политикатыгар судаарыстыбаннай кэмитиэтэ өрүһү паромунан туоратыы төлөбүрүн саҥа тарыыптарын бигэргэтэрин күүтэллэр. Ефимов этэринэн, бу уларыйыы пассажирдарга сыһыана суох. Сыана оннунан хаалыаҕа: улахан киһиэхэ – 350 солк., оҕоҕо – 200 солк.

«Оттон тырааныспары туоратыы тарыыба үрдүөҕэ, Госкомцен бирикээһэ тахсыан наада», – диэтэ Николай Ефимов.