Бастакы оҕо иһин төлөбүр: төһөнү, хайдах ылыахха сөбүй

Арктика оройуоннарыгар төлөбүр 64 912 солк., атын улуустарга уонна өрөспүүбүлүкэ киин куоратыгар 54 370 солк буолар, диэн “Якутия 24” эрэгийиэннээҕи Үлэ министиэристибэтин пресс-сулууспатыгар сигэнэн иһитиннэрэр.

Бастакы оҕотун төрөппүт эбэтэр иитэ ылбыт дьахтар, өскөтүн Саха сиригэр үс сылтан кырата суох олорбут буоллаҕына, төлөбүр ылар бырааптанар. Сорох түбэлтэҕэ оҕо аҕата эмиэ сөп түбэһиэн сөп, ол эрээри бу ураты көрүүнү эрэйэр. Төлөбүр ылар быраабы бигэргэтэргэ, төһө уһуннук олорбутун туоһулуур докумуон ирдэниэн сөп.

Төлөбүрдэри ылар киһи баан реквизиттэрэ социальнай хааччыйыы уорганнарыгар баар буоллахтарына, сайабылыанньа биэрэр наадата суох. Атын түгэҥҥэ, эрдэттэн төлөбүргэ сөбүлэҥ ирдэнэр буоллаҕына, сайабылыанньаны Судаарыстыбаннай өҥөлөр порталыгар эбэтэр “Мин докумуоннарым” элбэх функциялаах киин нөҥүө биэриэххэ наада. Төлөбүр оҕо үс сааһын туолуор диэри оҥоһуллар.

Ыйытыылардаах буоллаххытына 8-800-100-0001 нүөмэргэ эрийиэххитин сөп.