«Басхан-2025» ыччат дьыалабыай оонньуута ыытылынна

Муус устар 10 күнүгэр V төгүлүн ыытыллар уолаттар «Басхан-2025» өрөспүүбүлүкэтээҕи дьыалабыай оонньуулара түмүктэннэ.

Манна Саха сирин 12 улууһуттан уопсайа 20 уолан күөн көрүстэ. Икки күн устата ыытыллыбыт куонкуруска кыттааччылар биэс тургутар түhүмэххэ кииристилэр: «Удьуор утум», «Өркөн өй», «Дойду салайааччыта – мин тус көрүүбүнэн», «Мөккүөр», «Айыы умсулҕана».

Күөн күрэс түмүгүнэн быйылгы дьыалабыай оонньуу кыайыылаахтарынан буоллулар:

1-кы үрдэл — Ярослав Иванов, Горнай улууһун Бэрдьигэстээх нэһилиэгин В.В. Филиппов аатынан улуустааҕы гимназия 10-с кылааһын үөрэнээччитэ;

2-с үрдэл — Иннокентий Боронов, Бүлүү улууһун Тоҕус нэһилиэгин Е.А. Степанова аатынан орто оскуолатын 10-с кылааһын үөрэнээччитэ.

3-с үрдэл — Эрсан Макаров, И.М. Павлов аатынан Чурапчы орто оскуолатын 10-с кылааһын үөрэнээччитэ.

Оттон «Басхан-2025» Кылаан кыайыылааҕынан Александр Адамов, Амма улууһун Алтан нэһилиэгин Е.С. Никитина аатынан орто оскуолатын 11-с кылааһын үөрэнээччитэ, буолла.

Маны таһынан «Көрөөччү биһирэбилэ» ааты куоластааһын түмүгүнэн И.Г. Тимофеев аатынан Майа лиссиэйин 10-с кылааһын үөрэнээччитэ Ярослав Ксенофонтов ылла.

Хаартыска: Ыччат министиэристибэтин телеграм-ханаалыттан