Барыта соһуччу...

Онуоха хас сыл аайы арай биһиэхэ соһуччу, эмискэ буолан иһэр. Сааспыт эмискэ кэлбит үһү, эмискэ тымныйбыт, сылыйбыт, хаар, ардах түспүт. Онуоха олохтоох дьон эрээри барытыттан соһуйан иһэбит.

Бу аҕыйах хонуктааҕыта эрэ халлааммыт сылыйан куорат олохтоохторо сото, бас сыгынньах сылдьыбыт эбит буоллахпытына, аны билигин кэлэн халыҥ таҥаспытын таҥнан тоҥон чиччигинээтибит. Ким эрэ: «Аны сылыйда, тымныйбат, онон халыҥ таҥастарбын барытын дьааһыктаан уурталаан хоспоххо таһаардым”, – диэн баран билигин чараас таҥаһынан тоҥо сылдьар.

Аны туран чалбах, бадараан айдаана, куорат салалтатын мөх да мөх, үөх да үөх. Кинилэр сакаастаан тымныыны, туманы, бадарааны аҕалалларын курдук. Бу сыл аайы куруук хатыланар хартыына. Үлэлээбэттэр диэн буолбатах, бүгүн ыраастанна, сарсын өлгөм хаар, ардах түстэ. Хайыаҥый, айылҕа туһунан сокуоннаах эбээт. Кинилэр да күүстэрин харыстаабакка, түүннэри-күнүстэри үлэлииллэр. Мөҕүөххэ эрэ диэбит курдук.

Саха сиригэр төрөөн, онно улаатан аныаха диэри айылҕа уларыйар күүһүгэр үөрэниэхпитин да сөп этэ. Хайдахтаах курдук кэрэ дойдуга олоробут – ыраас салгын, күөх тыа, ас-үөл амтаннааҕа, сирбит баайа-дуола, дьон киэнэ үтүөтэ.

Мин сайын сиэннэрбэр кэпсиибин: «Арай тыаҕа отоннуу, дьэдьэннии сырыттахпытына хантан эрэ хахай, слон, эриэн үөн тахсан кэллин, сөтүөлүү бардахпытына крокодил, акула устан кэллин. Биһиги олорор сибитигэр оннук суох, туохтан да куттаммакка төһө баҕарар айылҕаҕа сылдьабыт, сөтүөлүүбүт. Онон дойдугутун таптааҥ, Саха сиригэр төрөөбүккүтүгэр махтаныҥ», – диэн.

Онон, доҕоттоор, барыттан бары соһуйан бүтүҥ, кэлиэхтээх кэлиэҕэ, барыахтаах барыаҕа, син барыта орун-оннугар түһэн ааһан иһэр буолбаат, дойбутунан киэн туттуоҕуҥ, таптыаҕыҥ!