Барыһыраары ороскуотуруу

Саҥа дьыл бырааһынньыгар, өрөбүл күннэргэ араас тэрээһин элбиирин туһанан, түөкүттэр албын сайт оҥостор буолбуттар. Онтуларыгар араас кэнсиэри, испэктээги кэчигирэтэн баран, удамыр сыананан көөчүктээн билиэт ыллараллар. Ол аата, дьиҥ баар официальнай саайты үтүгүннэрэн, двойник-саайтары арынан, сымыйа билиэти атыылыыллар. Дьиҥнээх тэрилтэ киэнигэр дьүөрэлээн  логотип олордон, араас үчүгэй отзывтары таһаараллар. Ол фишинговай саайтарыгар киллэрэр үктэтиилээх сигэлэри ыыталлар. Дьон ону билбэккэ, дьиҥнээх билиэт дии санаан, харчы төлүүллэр. Үчүгэй миэстэҕэ түбэспиттэриттэн үөрэллэр. Ол кэнниттэн ыйыллыбыт QR-код туһанаары, билиэттэрин билээри гыммыттара, онтулара олох да үлэлээбэт, сымыйа буолан хомотор.

Маннааҕы култуура тэрилтэлэрин каассатын төлөпүөнүгэр эрийэн чопчулаһар кыах баар. Ол эбэтэр чуолаан киин сирдэргэ буолар тэрээһиннэргэ билиэт ылаары албыҥҥа киириэххэ сөп.

Сайт сымыйа (подделка) буоларын хайдах билиэххэ сөбүй?

Мантан хайата эрэ сөп түбэстэ да, итэҕэйбэт көнө:

*Сайт разделларын барытын арыйталаан көр. Үгүс өттүгэр сымыйа сайтка билиэт атыытын туһунан иһитиннэрииттэн атын туох да суох буолар.

*Атыылыыр тэрилтэ юридическай реквизитин (ИНН, аадырыһа) буларыҥ саарбах. Ханнык да сибээстэһэр төлөпүөн, оферта уонна конфеденциальность бэлиитикэтин сигэтэ көстүбэт.

*Сибээстэһэргэ Google, «Яндекс», Mail почталара биитэр ханнык эмэ мессенджер нүөмэрэ ыйыллыбыт буолар. Төлөбүр атын тэрилтэ аатыгар биитэр биирдиилээн киһиэхэ барар буолар. 

*Сайт иһитиннэриитэ саҥардыллыахтаах болдьоҕо сымыйа, авторскай быраап туһунан иһитиннэрии киирбэтэх буолар.

*Албыҥҥа үктэппэт гына, дьиҥ көмүскэллээх официальнай сайтары туһаныҥ. Холобур, аадырыс суруллар строкатыгар HTTPS буукубалара уонна замок значога булгуччу суруллубут буолуохтаах.

*Сайт хас сылтан үлэлээн саҕалаабытын көр. Соторутааҕыта биитэр саҥа аһыллыбыт буолла да, тута сэрэхэдийэр ордук.

Интэриниэккэ быһаарсар дьон Yandex Site status check эбэтэр «Google безопасный просмотр» курдук босхо онлайн-платформаҕа  туһааннаах сайт аадырыһын уган, төһө буортулааҕын бэрэбиэркэлиэххитин сөп.

Итинник албын, ол эбэтэр фишинговай сайты көрдөххө, тута Госуслугаҕа эбэтэр анал ИС Антифишинг сайтка үҥсүүтэ түһэрэргэ сүбэлииллэр. Оччотугар үгүс дьону быыһыаххыт.