«Бары үйэтитиллиэхтэригэр диэри күүспүт кыайарынан кинигэ таһаарыахпыт»

Ол түмүгэр АБДЬ-га өлбүт буойуттарга аналлаах кинигэ тахсыбытыгар Евгения Исаевна Михайловаҕа махтала муҥура суох.

Розалия Петровна Макарова  –  ХИФУ филология факультетыгар нуучча тылыгар уонна литературатыгар үөрэтэр ньымалар кафедратын преподавателэ:

– Биһиги, Макаровтар дьиэ кэргэн, тапталлаах аҕабыт, кэргэним Виталий Евгеньевич Макаров 2023 с. Оборона министиэристибэтин кытта хантараак баттаһан, анал байыаннай дьайыыга барбыта. Хомойуох иһин, 2024 с. балаҕан ыйын 13 күнүгэр Угледар куораты ылар иһин кимэн киириигэ өстөөх дронуттан өлөөхтөөбүтэ. Онтон ыла биһиги дьиэ кэргэн Саха сириттэн баран сэриигэ суорума суолламмыт бары эр дьоммут, чулуу уолаттарбыт ааттарын үйэтитиигэ үлэлиибит.

Бэйэм кинигэ таһаарыыга кыра да буоллар уопуттаахпын. Уонна биһиги  – өлбүт буойуттар чугас дьонноро – үйэтитиигэ кыһаллыбатахпына, ким кыһаллыай?! Дьоммут – оҕолорбут, кэргэттэрбит сырдык ааттара, кыайыыны уһансыбыттара сүтэн-симэлийэн хаалыа суохтаах.

Ол курдук кинигэ тахсарын үп өттүнэн өйөөбүт муниципальнай салайыныы баһылыктарын кэмитиэтин бэрэссэдээтэлэ Степан Анатольевич Саргыдаевка, ол кэмитиэт хамыыһыйатын бэрэссэдээтэлэ Владимир Владимирович Птициҥҥэ, сүбэ-ама, өйөбүл буолбут ХИФУ ректора Анатолий Николаевич Николаевка, кинигэни чэпчэтии биэрэн таһааттарбыт Ю.А. Гагарин аатынан типография дириэктэрэ Владимир Иннокентьевич Сыромятниковка улахан махталбын этэбин.

Ону тэҥэ кинигэ бытархай үлэтэ элбэх буоллаҕа – киирбит хаартыска хаачыстыбатын тупсарыы, эрэдээксийэлээһин, таҥыы, о.д.а.. Манна күүс-көмө буолбут “Кэриэс Таас” ритуальнай фирма дириэктирэ Мичил Еремеевка, чааһынай таһаарааччы Александра Туласыноваҕа, чааһынай эрэдээктэр Анна Захароваҕа улахан махтал!

Кинигэ таһаарыытын үбүлээһин кыһалҕатынан М.К. Аммосов аатынан ХИФУ Бэрэсидьиэнэ Евгения Исаевна Михайловаҕа тиийбитим.

Бу иннинэ Дьахталлар сийиэстэрэ буолбут этэ. Евгения Исаевна эмиэ оруобуна биһиги курдук көҕүлээһиннээх буолан, өйөөбүтэ.

Үйэтитии биир хайысхатынан 148 буойуҥҥа аналлаах быыстапка буолбута. Дизайнын уолум Юрий Витальевич Макаров, бэчээккэ таһаарыыга Нюргун Семенович Саввинов чэпчэтиини оҥорбуттара.

АБДь сылдьан охтубут буойуттар ааттарын үйэтитэр  аналлаах тэрээһиннэргэ өйүүр, көмөлөһөр бука бары дьоммутугар «Киин куорат» нөҥүө махталбытын биллэрэбит.

Бэлиэтээн эттэххэ, иккис уонна үһүс таһаарыыларга салгыы ахтыы, хаартыска хомуйуута буола турар.