"Барҕарыы" – сахалыы тылынан кэмпириэнсийэ саҕаланна

Бүгүн, кулун тутар 18 күнүгэр, өрөспүүбүлүкэтээҕи лиссиэй-интэринээккэ "Барҕарыы" төрөөбүт тылынан ыытыллар научнай-практическай кэмпириэнсийэ үөрүүлээх аһыллыыта буолла. Быйыл иккис төгүлүн ыытыллар өрөспүүбүлүкэтээҕи кэмпириэнсийэ "Барҕарыы" национальнай пуонда тэриллибитэ 35 сылыгар ананар. Кэмпириэнсийэ сүрүн соругунан сэргэх айар көҕүлээһиннэри булуу, сахалыы төрөөбүт тылынан чинчийэр үлэни ыытарга интэриэстээх оҕолору өйөөһүн буолар. Ону тэҥэ болҕомто төрөөбүт тылы киэҥник туттууга, саха тылынан билими тарҕатыыга ууруллар.

Тэрээһиҥҥэ Дьокуускай куорат уонна Саха сирин 15 улууһун оскуолаларыттан 7-11-с кылаас үөрэнээччилэрэ – барыта 450 оҕо кытта кэллэ. Кэмпириэнсийэ гуманитарнай, естественнэй уонна техническэй билимнэри хабар 18 сиэксийэнэн үлэлиэ. 
Түмүктүүр, кыайыылаахтары эҕэрдэлиир дьоро тэрээһин кулун тутар 19 күнүгэр Саха академическай тыйаатырга буолуо.
Бу тэрээһин сахабыт тыла тыыннаах хааларыгар эрэл кыымын күөдьүтэр.