Балаҕан ыйын 1 күнүн көрсө…
1975 сыл күһүнүгэр Саха АССР оскуолаларыгар маҥнайгы кылааска киирбиттэргэ быйылгы үөрэх дьыла лоп курдук 50-с. Ону таһынан быйылгы Улуу Кыайыы 80 сылыгар 40 сыл анараа өттүгэр оскуолабытын түмүктээбит выпускниктар.
Бу үбүлүөйдээх сылынан өрөспүүбүлүкэтээҕи "Выпуск-85"уопсастыбаннай түмсүү (салайааччы Алексей Васильев) биир улахан ситиһиитинэн атырдьах ыйыгар Чурапчыга ыытыллыбыт араас сылларга оскуоланы бүтэрбиттэр ортолоругар култуура уонна спорт бэстибээлигэр бэйэлэрин группаларыгар маҥнайгы миэстэни ылыылара, ансаамбылынан ырыаҕа Гран-при буолуулара буолла.
Оттон 2025 сыл балаҕан ыйын 1 күнүн көрсө Үөһээ Бүлүү улууһун Далыр орто оскуолатыгар 50 сыл анараа өттүгэр маҥнайгы кылааска киирбиттэр быйылгы оскуоланы атыллыыр хас биирдии үөрэнээччигэ уруок ааҕар анал остуол бэлэхтэрэ истибит киһини долгуппат буолуон табыллыбат.
Артур Егоров, Далыр оскуолатын 1985 сыллааҕы выпускнига:
- Оскуолаҕа киирбиппит 50 сылынан балаҕан ыйын 1 күнүгэр бастакы кылааска киирэр оҕолорго барыларыгар уруок ааҕар остуолу туттарыахпыт. Сүрүн бэлэхпитинэн оскуоланы бүтэрбиппит 40 сылынан "Я люблю Далырскую школу" диэн стела буолар. Иһигэр уоттаах, онон хараҥаҕа ыраахтан көстөн турар буолуохтаах. Икки өттүгэр олорор ыскамыайкаларын бииргэ үөрэммит уолаттарбыт оҥорон бэлэмнээбиттэрэ. Бииргэ үөрэммиттэр сорохпут атын улуустарга олохсуйан олоробут. Ол да буоллар уопсай дьыаланы бары бииргэ сүбэлэһэн быһаарсабыт. Холобур, бастаан "Я люблю ДСОШ" диэн баран, урут оскуолаҕа үөрэммит дьоннорго эмиэ сыһыаннаах буоллун диэн, "Я люблю Далырскую школу" диэн суруйарга сүбэлэстибит. Бары харчынан кыттыспыппыт. Билигин Далырга уонча үөлээннээхпит олороллор. Билии күнүгэр атын улуустартан тиийэр кыахтаах оҕолорбут бэлэҕи биэрэр түгэҥҥэ кыттыыны ылыахтара. Стела алын чааһыгар 1985 сыллааҕы выпускниктар өрөспүүбүлүкэтээҕи түмсүүлэрин логотиба ойуулаах.
Санатан этэр буоллахпытына, 2019 сылга Выпуск85 ыыппыт "Үтүө дьыала КУБОГА" бырайыагын чэрчитинэн бу кылаас "Учууталга махтал" диэнинэн учууталларыгар дьиэ туппуттара биир үйэлээх үтүө дьыаланан буолар.
Сонуннар
Ордук ааҕаллар
