«Бадараан шоу» – Тааттаҕа

– Бастаан бу күрэх туохтан саҕаламмытай?

– Аан бастаан 2012 сыллаахха суоппар уолаттар мөккүһүүлэриттэн саҕаламмыта. УАЗ массыыналаах Евгений Герасимов, Иван Каприн уонна Николай диэн табаарыстыылар биирдэ гарааска олорон хайаларын массыыната ордук кыахтааҕын быһаарсыбыттар. Ити кэннэ күөн көрсөргө быһаарыммыттар. Куһаҕан суоллаах-иистээх, уулаах-хаардаах сири булан, бастаан алта массыына буолан куоталаһаллар. Мин онно алҕас көрөөччүнэн тиийэн баран, дьоҥҥо-сэргэҕэ таһаарар туһунан толкуй үөскээбитэ.

Онтон ыла бу күрэхтэһиини быйыл 12-с төгүлүн ыыттыбыт.

– Сыала-соруга тугуй? Уонна быйылгы күрэхтэһии туһунан кэпсээтэххэ...

– Бэйэм  Ытык Күөл 15№-дээх уокуругар дьокутаат буоларым быһыытынан дьону-сэргэни кытта үгүстүк алтыһабын. Онон бу бырайыакка спортсменнар түмэр, тиэхиньикэни сайыннарар, маассабай спорду тарҕатар сыалы-соругу туруорбутум.

Быйылгы күрэххэ Дьокуускай куорат, Сунтаар, Нам, Мэҥэ Хаҥалас, Чурапчы, Уус Алдан, Амма, Таатта хамаандалара – уопсайа 40 экипаж кыттыыны ылла. Бары Саха сиригэр баар УАЗ массыыналарга ыытыллар “Хаар айан”, “Бадараан шоу”, “Татарин трофи” күрэхтэр кыттыылаахтара. Бары ааттаах-суоллаах дьон. Сорохторо автомобильнай спорка Арассыыйаҕа  бастакы, иккис, үһүс разрядтаах уолаттар.

Биһиги ыытар “Бадараан шоу” күрэхпит икки кылааска арахсар: инжектор уонна карбюратор мотуордаахтар. Икки күн устата түөрт түһүмэҕинэн күрэхтэстилэр. Ол курдук, инжектор кылааһыгар Таатта улууһуттан «Форвард» экипаж кыайда: пилот Петр Васильев, штурман   Николай Варламов. Карбюратор кылааһыгар кыайыылаах үрдүк аатын Мэҥэ Хаҥаластан «Дьураа Хара» экипаж ылла – пилот Айаан Максимов, штурман Алексей Петухов. Бу уолаттар түөрт түһүмэххэ төрдүөннэригэр кыһыл көмүс мэтээли кэтэн бардылар.