Баһылыктар Арассыыйа Дьоруойа Андрей Григорьевы кытта көрүстүлэр

Ийэ дойдуну көмүскээччи сылынан биллэриллибит 2025 сыл Саха сиригэр 10-с Арассыыйа Дьоруойун бэлэхтээтэ. 
«Тута» диэн позывнойдаах Ньурба ыччата Андрей Григорьев биир-бииргэ кытаанах киирсиигэ ВСУ саллаатын сууһарбыт видеота тарҕаммытын, ол кэннэ хорсун саллаат салгыы хас да күн соҕотоҕун сылдьан, өстөөх өссө хас да саллаатын, бронетиэхиньикэни суох гыммыта, боеприпастаах ыскылааты эстэрбитэ биллэн, Арассыыйа Дьоруойун үрдүк аатын ылла.
«Биһиги көрсүһүүбүтүгэр Андрей ол кыргыһыыны кэпсээбитэ. Ити кэнниттэн өссө да хас күн өстөөх тыылыгар сылдьан сэриилэспит. Бэйэтин дьонугар ол эрэ кэнниттэн тахсыбыт. Кини олус симик, бэйэтин дьоруойунан ааҕыммат. Видео тарҕамматаҕа буоллар, Андрей ити хорсун быһыыларын туһунан кимиэхэ да кэпсээбэт киһи. Арассыыйа кыаҕа маннык дьонтон таҥыллар. Андрей Григорьевы кытта кэпсэтэ олорон бу анал байыаннай дьайыыга Саха сириттэн кытта сылдьар байыастарынан ис сүрэхпиттэн киэн туттуу кууспута. Андрей ити кыргыһыыга илдьэ сылдьыбыт саха быһаҕын бойобуой табаарыстарыгар хаалларбыт. Мин киниэхэ Саха сирин олохтоохторун барыбыт ааппытыттан саҥа быһаҕа бэлэхтээтим. Кинини харыстаатын уонна араҥаччылаатын диэн», - диэн Айсен Николаев бэйэтин телеграм-ханаалыгар суруйар. 
Арассыыйа Дьоруойа Андрей Григорьевы кытта Дьокуускай куорат баһылыга эмиэ көрсөн турар. Евгений Григорьев киниэхэ урбаанньыттар В.И. уонна В.В. Шадриннар көҕүлээһиннэринэн «Рысь-2» хаартан, барадаарнтан иҥнибэт тиэхиньикэни туттарбыта. Саха сирин олохтоохторун аатыттан дрон детекторын бэлэхтээбитэ.
Андрей Григорьев куорат баһылыгын кытта көрсүһүүтүгэр төрөппүт уола, чугас аймахтара, доҕотторо, төрөөбүт Ньурбатын бэрэстэбиитэллэрэ уонна «Рысь Саха» вездеход оҥорор тэрилтэ урбаанньыттара сырыттылар. 
Санатар буоллахха, Андрей Григорьев аҕыс уол уонна биир кыыс бииргэ төрөөбүттээх, оттон бэйэтэ биэс оҕолоох аҕа, диэн иһитиннэрэр Олохтоох дьаһалта пресс-сулууспата.