Баһылык «Якутскгеология» АУо үлэһиттэрин иннигэр отчуоттаата

Олунньу 24 күнүгэр баһылык Евгений Григорьев ааспыт 2024 сыл көрдөрүүлэринэн уонна 2025 сыл былааннарынан «Якутскгеология» АУо үлэһиттэрин иннигэр отчуоттаата. 
Евгений Григорьев 2030 сылга диэри ылыллыбыт Дьокуускай куорат маастар-былаанын, муниципальнай, өрөспүүбүлүкэ таһымнаах  бырагыраамалар уонна «Демография», «Үөрэхтээһин», «Куттала суох уонна хаачыстыбалаах суоллар» о.д.а. нацбырайыактар иһинэн ыытыллар үлэни кэпсээтэ. 

Баһылык отчуота хаарбах туруктаах дьиэттэн көһөрүү, суол, үөрэх, култуура тэрилтэлэрин тутуу, өрөмүөн, уопсастыбаннай тырааныспар ситимин сайыннарыы, сылаас тохтобуллары элбэтии, уопсастыбаннай туоналары тэрийии о.д.а. боппуруостарын сиһилии таарыйда. 
Отчуот кэнниттэн «Якутскгеология» АУо үлэһиттэрэ геология исписэлиистэрин муниципальнай олорор дьиэнэн хааччыйыы, куораты көҕөрдүү, тиэргэн өрөмүөнүн боппуруостарын таарыйдылар, үөрэх тэрилтэлэрин чугаһыгар массыына туруорар сир кэмчитин ыйдылар, диэн иһитиннэрэр Олохтоох дьаһалта пресс-сулууспата.