Баһылык тус приема олох бары кыһалҕаларынан ыытыллар

От ыйын 21 күнүгэр баһылык Евгений Григорьев уочараттаах тус приемугар гражданнар сир боппуруоһунан, тиэргэн өрөмүөнүнэн, ол иһигэр бетоҥҥа мэһэйдэппит канализация ситимин боппуруоһунан кэлбиттэр. 
Ол курдук, урбаанньыт Степан Э. тупсарыы үлэтин кэмигэр канализация турбатын ситимэ саҥа ууруллубут аспаалтан сылтаан мөлтөхтүк үлэлиирин туһунан үҥсүүлээх кэлбит. 
Евгений Григорьев бу боппуруос сокуон уонна ГОСТ ирдэбиллэринэн бэрэбиэркэлэниэҕэ диэн хоруйдаата. Бэлиэтээн эттэххэ, турбаны аспаалы алдьаппакка эрэ толору кыаҕынан үлэлэтэр кыах баар.
Куорат олохтооҕо Зара Т. ИЖС учаастагын официальнайдык докумуоннатар уонна оҕолорун пропискалыыр кыаллыбакка сылдьарын үҥүстэ. Баһылык Сир сыһыаннаһыыларыгар агентствоҕа элбэх оҕолоох ийэ боппуруоһун үөрэтэргэ сорудахтаата. Агентство салайааччыта Сергей Тимошенко быһаарбытынан, маннык процедура хас да түһүмэхтээн ыытылларын быһаарда уонна сири бас билээччигэ туһааннаах докумуоннарын толорбутун кэннэ тус приемҥа киирэ сылдьарыгар эттэ. 
Санатар буоллахха, баһылык гражданнары кытта эрдэттэн суруйтарыынан көрсөр. Көрсүһүүгэ суруйтарарга Сурук отделыгар эбэтэр Олохтоох дьаһалта тэрилтэлэригэр сайабылыанньа суруйуохха наада. Сайабылыанньаҕа быһаартарыахтаах боппуруоһу сиһилии ыйар уонна инники өттүгэр атын инстанцияларынан туох быһаарыы ылыллыбытын сыһыарар наада. Маны сэргэ тус дааннайдары ыйар ирдэнэр: төлөпүөн нүөмэрэ, электроннай аадырыс.
Сайабылыанньаны ыытар ньымалар:
– yakutsk@sakha.ru Олохтоох дьаһалта официальнай электроннай почтатыгар;
– 40-80-76 төлөпүөнүнэн;
– Дьокуускай к., Ленин проспега, 15 аадырыска тиийэн;
– Сурук отделын аадырыһа: Дьокуускай к., Ленин проспега, 15, 113 кэб., үлэ күннэригэр сарсыарда 09:00 чаастан киэһэ 18:00 чааска диэри (эбиэккэ тохтобул – 13:00-14:00 чч.).