Баһылык Евгений Григорьев култуура үлэһиттэрин иннигэр отчуотугар миниистир Афанасий Ноев кыттыыны ылла

Д.К. Сивцев – Суорун Омоллоон аатынан Опера уонна балет тыйаатырын дьиэтигэр култуура эйгэтин үлэһиттэрин иннигэр баһылык Евгений Григорьев 2024 сыл түмүктэринэн уонна 2025 сыл былааннарынан отчуота култуура миниистирэ Афанасий Ноев кыттыылаах буолан ааста.
Евгений Григорьев култуура үлэһиттэрин болҕомтотун дойду баһылыга Владимир Путин көҕүлээһининэн олоххо киирэр нацбырайыактарга хатаата. Ол курдук, Дьокуускай куорат 2019 сылтан 6 национальнай бырайыакка ситиһиилээхтик кыттан, үөрэх кыһаларын, спорт эбийиэктэрин тутуу, өрөмүөн, уулусса-суол ситимин оҥоруу тэтимэ биллэ тупсубутун, маны сэргэ 2024 сылтан куорат-маастар былаанынан үлэ саҕаланан, Ленин болуоссата, Роман Дмитриев аатынан уонна Сайсары эбэ кыталлара курдук үс бөдөҥ уопсастыбаннай туона тутуллубуттарын бэлиэтээтэ. 
2024 сыл биир бөдөҥ ситиһиитинэн элбэх оҕолоохторго бэриллиэхтээх сирдэр боппуруостара быһаарыллыбытын, сотору кэминэн аны анал байыаннай дьайыы кыттыылаахтарыгар учаастактары түҥэтии саҕаланаары турарын ааттаата. 
Ааспыт 2024 сыл култуура эйгэтигэр бэлиэ суоллары хаалларда. Ол курдук, Дьокуускайдааҕы Арчы дьиэтигэр хапытаалынай өрөмүөн ыытылынна, Дьокуускай куорат историятын музейыгар, В.Г. Белинскэй аатынан уонна «Маяк» библиотекалар филиалларыгар өрөмүөн барда, үс библиотекаҕа RFID-технология киирдэ.
Библиотекалар өрөмүөннэрэ 2025 сылга салҕанар, үс култуура дьиэтигэр хапытаалынай өрөмүөн былааннанар, «Үс Хатыҥ» комплекска эмиэ тупсарыы үлэтэ күүтүллэр. Дьокуускай куорат историятын музейыгар юридическай сирэй статуһа бэриллэн, куорат музейдарын ситимин тэрийии саҕаланыаҕа. Тулагыга 2 №-дээх Оҕо искусствотын оскуолатын филиала арыллыаҕа. 
Култуура, искусство эйгэтин үлэһиттэрэ бастатан туран 1 №-дээх Оҕо искусствотын оскуолатын «Бригантина» дьиэҕэ уонна Л.А. Ким аатынан ойуулуур-дьүһүннүүр искусство оскуолатын П. Алексеев аатынан уулуссаҕа көһөрүү боппуруоһун, Кырдьаҕас куоракка арыгынан эргинэр тэрилтэлэр үлэлииллэрэ сөбө суоҕун, куорат киинигэр массыына туруорар сир тиийбэтин, Опера уонна балет тыйаатырын тиэргэнин өрөмүөнүн, сайыҥҥы өттүгэр уулуссаҕа кинигэ атыылыыр миэстэлэр наадаларын көтөхтүлэр. Маны сэргэ Тулагы Киллэм нэһилиэгин оройуонугар туристыыр маршруттары тэрийэр сөптөөҕө, Национальнай музейга уонна Опера уонна балет тыйаатырыгар афиша ыйыыр баннердар наадаларын бэлиэтээтилэр, диэн Олохтоох дьаһалта пресс-сулууспата иһитиннэрэр.