Баһылык элбэх функциялаах спорт комплексын тутуу хаамыытын билистэ

Киин куоракка 17-с кыбаарталга тутуллар саҥа «Спортивнай» түөлбэҕэ 5 №-дээх Оҕо спорт оскуолатын (ДЮСШ) филиала арыллыаҕа.
Тутуу хаамыытын куорат баһылыга Евгений Григорьев алтынньы 23 күнүгэр билистэ. 
Баһылык бэлиэтээбитинэн, баара эрэ 4 ый анараа өттүгэр манна икки хаарбах дьиэ турбута. Бүгүҥҥү күҥҥэ бу дьиэлэр 80 кыбартыыраларын олохтоохторо бука бары көһөрүллэн тураллар. Оттон ол дьиэлэр оннуларыгар сыл бүтүөр диэри 1000 миэстэлээх спорт комплекса үлэҕэ киириэҕэ. Манна скалодром баар буолуоҕа, единоборствонан, остуол тенниһинэн дьарыктанар кыах үөскүөҕэ.
Ол курдук, дьиэ каркааһа номнуо оҥоһуллан, модульнай хочуолунай туран, итиини биэрэргэ бэлэм. Спорт тээбиринэ атыылаһыллан турар. Онон 2025 сыл бүтүүтэ эбийиэк үлэҕэ киирэр туруктаах.
Санатар буоллахха, «Спортивнай» түөлбэҕэ тутуллар элбэх функциялаах спорт комплекса 2021 сылтан бэттэх Дьокуускайга төрдүс саҥа ДЮСШ арыллыаҕа.
Ити курдук киин куоракка ааспыт 5 сыл иһигэр 3 ДЮСШ, 3 оскуола иһинээҕи спорт саалата тутулланнар, баар эбийиэктэргэ өрөмүөн ыытыллан, спордунан дьарыктанар оҕо ахсаана 4,7 тыһыынчаттан 8 тыһыынчаҕа диэри улаатта. Оттон бу ДЮСШ үлэҕэ киириитэ ити көрдөрүүнү 9 тыһыынчаҕа тиэрдиэҕэ, диэн Олохтоох дьаһалта пресс-сулууспата иһитиннэрэр.