Баһаарынай сулууспалар күрэхтэһэллэр

Дьокуускайга Арассыыйатааҕы Баһаарынай охрана күнүн чэрчитинэн өрөспүүбүлүкэтээҕи баһаарынай-быыһыыр спорка аһаҕас күрэхтэһии буола турар. Бу туһунан Саха сиринээҕи ЫБМ пресс-сулууспата иһитиннэрдэ.
Күрэхтэһиигэ федеральнай уонна Саха сиринээҕи баһаарынай сулууспалар бэрэстэбиитэллэрин 11 хамаандата – 50 спортсмен, үс түһүмэҕинэн күрэс былдьаһаллар: сүүс миэтэрэ усталаах харгыстаах балаһаны туорааһын, 4 этээстээх үөрэтэр башняны штурмалыыр кирилиэһинэн дабайыы уонна "бойобуой разверывание" – баһаарынай массыынаны уоту умуруорууга бэлэмнээн туруоруу.
"Күрэхтэһии Саха сиригэр баһаарынай-быыһыыр спорду тарҕатар, сайыннарар уонна бу спорт көрүҥүнэн идэлээх үлэһиттэр спортивнай маастарыстыбаларын таһымын үрдэтэр соруктаах ыытыллар," – диэн Саха сиринээҕи ЫБМ салайааччытын солбуйааччы Григорий Колданов күрэхтэһии туһунан санаатын үллэһиннэ.
Күрэхтэһии бастакы күнүгэр кыттааччылар мэһэйдэрдээх 100 миэтэрэлээх балаһаны туорааһыҥҥа күрэс былдьаспыт буоллахтарына, бүгүн күрэс икки түһүмэҕэр күрэхтэһэллэр. Судьуйалар кыттааччылар сорудаҕы тэтимнээхтик толорууларын эрэ буолбакка, нормативы чопчу толорууну эмиэ сыаналыахтара.

 Хаартыска: Саха сиринээҕи ЫБМ сайтыттан