Баһаартан сэрэхтээх буолуу ураты эрэсиимэ олохтонно

Олохтоох дьаһалта иһитиннэрэринэн, бэс ыйын 11 күнүттэн от ыйын 2 күнүгэр диэри киин куорат сиригэр-уотугар баһаартан сэрэхтээх буолуу ураты эрэсиимэ биллэрилиннэ.

Бу кэмҥэ бобуллар:

- ойуур үлэтигэр туттуллар уонна ойуур баһаарын сэрэтиигэ уонна умуруорууга үлэлиир тырааныспартан ураты тиэхиньикэнэн тыаҕа тахсыы;
- ойуур үлэһиттэриттэн ураты нэһилиэнньэ ойуурга, ол иһигэр тыа хаһаайыстыбатын сирдэригэр, саппаас сирдэргэ тахсыыта;
- аһы аһаҕас уокка, мангалы уо.д.а. тэрили туттан буһарыы. Уопсастыбаннай аһылык тэрилтэлэрэ (эрэстэрээн, кафе, бар, остолобуой, пиццерия, кофейня, бэлимиэн, блины астыыр тэрилтэлэр) аһаҕас уокка мангалга уо.д.а. тэрилинэн анал быһыллыбыт сиргэ, баһаартан сэрэхтээх буолуу быраабылатын тутуһан, чоҕу эрэ туттан буһараллара көҥүллэнэр.

Бу сирдэргэ сынньанар көҥүллэнэр, ол эрээри кутаа уоту оттор бобуллар:

— Кангалаас дьоҕус оройуонугар –  таас чоҕу тиэйэр сир кэннигэр (Өлүөнэ эбэҕэ);

— Хатас нэһилиэгэр – Покровскайдыыр суол, 20 км (Дьокуускайтан Покровскай диэки барар суол уҥа өттө);

— Губинскай уокурукка – 202-с түөлбэҕэ куорат сөтүөлүүр сирэ.

Манна сынньанар дьон шашлыгы чоххо буһарыахтарын сөп. Мангал тула баһаары утары хоруу, уоту умуруорар уу баар буолара ирдэнэр.

Дьокуускай куорат сиригэр-уотугар нэдиэлэ аайы өрөбүллэргэ уонна бырааһынньык күннэригэр ойуурга хонтуруоллуур, сэрэтэр тэрээһиннэр ыытыллаллар.  Ыам ыйын 1 күнүттэн бэс ыйын 15 күнүгэр диэри анал бөлөхтөр 17 эриэйдэҕэ сылдьыбыттар. 1 305 киһиэхэ инструктаж ыытыллыбыт, 703 листовка тарҕатыллыбыт. Биэс сэрэтии бэриллибит. Ону таһынан административнай кэһии иһин боротокуоллар толоруллубуттар.