Баһаартан сэрэхтээх буолуу сезонугар бэлэмнэнэбит

Ыам ыйын 3 күнүгэр киин куоракка Саха Өрөспүүбүлүкэтин Бырабыыталыстыбатын бэрэссэдээтэлин бастакы солбуйааччы Дмитрий Садовников региоҥҥа быһыы-майгы уонна баһаартан сэрэхтээх буолуу сезонун болдьоҕун арыйыы туһунан суһал штаб мунньаҕын ыытта. Мунньахха туһааннаах структуралар салайааччылара уонна олохтоох бэйэни салайыныы уорганнара кытыннылар. Бу туһунан Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата иһитиннэрдэ.
Саха Өрөспүүбүлүкэтин экологияҕа, айылҕа баайын туһаныыга уонна ойуур хаһаайыстыбатыгар миниистирэ, регион кылаабынай лесничэйэ Андрей Коноплев информациятынан, 2022 сыл ыам ыйын 1 күнүнээҕи туругунан, спутнигынан кэтээн көрүүгэ олоҕуран, хаар түргэнник ууллуута Амма, Чурапчы, Таатта, Мэҥэ Хаҥалас, Уус Алдан улуустарыгар көстөр. 
ИСДМ-Рослесхоз систиэмэ регистрациялаабытын анаалыһа көрдөрөрүнэн, 2022 сыл муус устар 26 күнүттэн ыам ыйын 2 күнүгэр диэри Ленскэй, Мииринэй, Уус Алдан, Сунтаар, Амма, Горнай уонна Бүлүү улуустарыгар көрдүгэннэр күөдьүйэллэр. Барыта 17 оннук туочука булуллубут. Былырыын бу кэмҥэ 40 көрдүгэн регистрацияламмыт. Ол саҕана статистикаҕа Амма, Уус Алдан киирбэтэхтэр.
Маай бырааһынньыктарыгар ойуур баһаарын таһаарбат курдук миэстэлэринэн сэрэтэр үлэни күүһүрдэргэ сорудахтаммыт. Мунньах кэмигэр күнүскү өттүгэр күүскэ сылыйан, хаар түргэнник ууллан, кус көҥүлэ саҕаланыытыгар кэккэ оройуоннарга ойуурга баһаар тахсар куттала баарын бэлиэтээбиттэр. 
Суһал штаб мунньаҕын түмүгүнэн, олохтоох бэйэни салайыныы уорганнарыгар нэһилиэнньэ ортотугар баһаартан сэрэтэр үлэни күүһүрдэргэ уонна бырааһынньык уһун өрөбүллэригэр айылҕаҕа баһаары таһаарбат сыалтан нэһилиэнньэлээх пууннарга патруллааһыны тэрийэргэ сорудахтанна. 
Суһал сулууспаларга Дмитрий Садовников саҥа көрдүгэннэр көстөллөрүн кэтииргэ, суох оҥорорго, баар быһыыны-майгыны анаалыстаан, халлаан туругун, хаар ууллуутун, умайар сибики  баарын учуоттаан 2022 сыллааҕы баһаартан сэрэхтээх буолуу сезонун арыйыы болдьоҕун чуолкайдыырга уонна туох баар сириэстибэлэри бэлэм турукка киллэрэргэ сорудахтаата. 
Санатар буоллахха, тыа хаһаайыстыбатыгар аналлаах сирдэргэ өртөөһүн бобуулаах.