Бүөтүр Тобуруокап: «Биир быыкаа хочулуок бараммат хааһытын сиэбитим»

Манна поэт рукописьтара, дьиэтээҕи библиотеката, тутта сылдьыбыт тус мала, араас кэмнэрдээҕи хаартыскалар бааллар. Норуот поэтын тиэргэнэ уруккутун курдук ыраастык, тупсаҕайдык дьаһаллан турар. Балыктыы киирэр ыллыгын кыйа айымньыларын дьоруойдара мас скульптура буолан кэккэлии турбуттарын «Тобуруокап ыллыга» экотропанан сылдьааччылар сэргии көрөллөр.

Галина Савинова, Петр Тобуруокап аатынан түмэл-уһаайба үлэһитэ:

– 2017 сыллаахха «Саха» НКИК устар бөлөҕө Волгоград уобалаһыгар саха норуодунай поэта П. Н. Тобуруокап туһунан документальнай киинэ уста сылдьан, Кузьмичи бөһүөлэк аттыгар саллааттар кырамталарын көрдүүр этэрээти кытта көрсүбүтэ. Бу айаҥҥа устар бөлөҕү кытта поэт күтүөтэ, суруйааччы Дмитрий Наумов 10 саастаах сиэниниин Ньургуннуун барса сылдьыбыттара. Саллааттар кырамталарын көрөн баран сиэн уол Ньургун аһара долгуйбута. Ол төрүөтүнэн хаһыылар эбиитин чопчу поэт П. Тобуруокап дивизията кыргыспыт сиригэр ыытылла тураллара буолбут. Дэлэгээссийэҕэ сылдьыбыт Наталья Михалева-Сайа «Биир быыкаа хочулуок бараммат хааһытын сиэбитим» диэн поэт хоһоонуттан быһа тардыыны ааҕаатын кытары, хаһааччылар саллаат хочулуогун хостоон таһаарбыттара. Бу, баҕар, оччотооҕу саллаат Петр Тобуруокап хааһы сиэбит хочулуога буолуон сөптөөх курдук...

Ол хочулуогу кинилэр улахан күндү мал курдук тутан-хабан, харайан аҕалбыттара биһиги түмэлбитигэр өстүөкүлэ витринаҕа хараллан, күндү экспонат буолан турар. Төһө да кэм аастын, сэрии сүппэт дуораана буолан, дьон өйүгэр-санаатыгар өйдөбүл буолуоҕа!