Бүлүүгэ бизоннары көрбүттэр

 “Тыымпынай” питомник салайааччыта Андрей Александров иһитиннэрбитинэн, бу атыыр бизоннар Горнай улуунун Куудук диэн сиригэр, Бүлүү улууһун кыраныыссатыттан чугас кыстаабыттар эбит.

СӨ Биологическай ресурсаларын дириэксийэтигэр кэпсээбиттэринэн, Саха сиригэр 2006 сыллаахтан ойуур бизонун ууһатар, ахсаанын элбэтэр үлэ ыытыллар. Бизоннар былыр Саха сиригэр үөскүү сылдьыбыттара биллэр.

Бизоннары иитэр кииннэр билигин Горнай, Өлүөхүмэ уонна Хаҥалас улуустарыгар бааллар.

Горнайга 2017-2018 сс. 60 бизону ыыппыттара билигин ахсааннара 120  тиийбит. Сүрүннээн Горнайынан ааһар Сиинэ үрэх сүнньүнэн үөскээбиттэр.

Ол эрэн айылҕа кыыллара саҥаттан саҥа сирдэри баһылаан иһиэхтэрин сөп. Горнайы ыаллыы сытар улуустарга тахсар буоллулар.  Ол курдук, бизоннар хас да үөрүнэн Горнай улууһун Кэйбэлэ уонна Хордоҕойдоох диэн сирдэринэн тарҕаннылар, ол Өлүөхүмэ улууһун Малыкан, Саҥыйахтаах, Мархачаан үрэхтэрин тардыытыгар чугас. Сиинэ үрэх тардыытынан бизоннар Бүлүүгэ тиийэллэр.

***

Бизоннары көрүстэхпитинэ олус сэрэхтээх буолуохтаахпыт. Атырдьах ыйын ортотуттан бизоннар иссэр кэмнэрэ саҕаланар уонна балаҕан ыйын бүтэһигэр диэри салҕанар. Ол кэмҥэ ордук атыыр бизоннар киһиэхэ уонна тырааныспарга кутталы үөскэтэллэр.  

Бизоннары көрдөххүтүнэ Биологическай ресурсалар дириэксийэлэригэр эрийэн иһитиннэриэхтээххит:  +7 (411-2) 42-12-17, эбэтэр электроннай почтаҕа суруйуоххутун сөп:  dbroopt@yandex.ru,  ubr_dbr@mail.ru.