Бүгүҥҥүттэн саҕаланна!

Саха сиригэр бастакы кылааска киириигэ оҕолору суруйтарыы муус устар 1 күнүгэр олохтоох бириэмэнэн сарсыарда 09:00 ч. саҕаланар. Төрөппүттэр сайабылыанньаларын Госуслуги портал нөҥүө биэриэхтэрин сөп. Оттон бүгүҥҥүттэн, кулун тутар 17 күнүттэн, сайабылыанньа харатын бэлэмниэххитин сөп. Бу эн тус кэбиниэккэр хараллан хаалыаҕа, оттон хампаанньа саҕаланнаҕына, “Отправить” диэни эрэ баттыыгын.

Санатан эттэххэ, Саха сиригэр бастакы кылааска ылыы икки түһүмэҕинэн ыытыллыаҕа: муус устар 1 күнүттэн 30 күнүгэр, уонна от ыйын 6 күнүттэн балаҕан ыйын 5 күнүгэр диэри. Бастакы түһүмэххэ оскуола анаммыт сиригэр олорор оҕолор төрөппүттэриттэн, ону тэҥэ уочарата суох, бастакы уочарат эбэтэр чэпчэтиилээх үөрэххэ киирэр бырааптаах ыаллартан сайаапкалары ылыахтара. Иккис түһүмэххэ оҕо олорор сириттэн тутулуга суох, босхо миэстэ тахсыбыт буоллаҕына, сайабылыанньа ылыллыаҕа.