Бүгүн Өлүөнэ эбэни бөртөлүөтүнэн туоратыахтара

Өлүөнэ өрүскэ гидрологическай быһыы-майгы уустугурбутунан, салгын олбохтоох суудуналар уонна аэроботтар сырыылара быстах кэмҥэ тохтотулунна. Бу туһунан СӨ Тырааныспарын уонна суол-иис хаһаайыстыбатын министиэристибэтэ иһитиннэрэр.

«Полярные авиалинии» авиахампаанньа Ми-8 бөртөлүөтүнэн Маҕан – Аллараа Бэстээх – Маҕан хайысхатынан рейстэри оҥорорго бэлэмин биллэрдэ. Көтүү бүгүн, ыам ыйын 18 күнүгэр, 12:00 чааска былааннанна.

Бөртөлүөтүнэн пассажирдары тиэйии тарыыба – 7 700 солкуобай (бары хомууру ааҕан туран). 2-тэн 12-гэр диэри саастаах оҕолорго  50%-наах чэпчэтии көрүллэр.

Билиэттэри «Полярные авиалинии» авиахампаанньа каассатыгар Маҕан аэропордугар (төл. 40-60-36), ону тэҥэ Аллараа Бэстээх бөһүөлэгин түһэр былаһааккатыгар атыылыахтара.