Бүгүҥҥү күн өрөспүүбүлүкэ историятыгар киириэ

Баараҕай оҥоһугу уопсайа 4800 ат күүстээх үс буксиртан иккитэ инниттэн состо, биирэ кэнниттэн аста. Манна 120 исписэлиис үлэлээтэ.

Бу технологияны тыйыс айылҕалаах сиргэ — күүстээх халааннардаах, муус көтөҕүллүүлээх уонна тутуу сезона кылгас кэмнээх Сахабыт сиригэр анаан таллылар. Оҥоһугу арҕаа туһаайыынан утары кытылтан 2300 миэтэрэ тэйиччи дьаакырдарынан таттаран ууга түһэрдилэр. Салгыы коффердамы туһанан өрүс түгэҕин дириҥэтиэхтэрэ. Бу улахан күргэ пилонун тирэҕин оҥоруохтаах. 

Өлүөнэ муостата — Арассыыйа бэрэсидьиэнэ Владимир Путин сорудаҕынан, «ВИС» бөлөх, «Олох  инфраструктура» национальнай бырайыак чэрчитинэн олоххо киирэр.

Аан дойдуга үйэлэргэ ирбэт тоҥноох сиргэ маннык уустук тутуу холобура суох.