Айыына Кожурова – «Маяк» бибилэтиэкэ ыҥырыылаах ыалдьыта
Көрсүһүүгэ Саха политехническэй лиссиэй үөрэнээччилэрэ кытыннылар. Бу туһунан тэрийээччилэр «Киин куоракка» анаан сонуннарын үллэстэллэр.
Айыына Амма Болугуруттан төрүттээх, Дьокуускай куорат 39 №-дээх оскуолатын V кылааһын үөрэнээччитэ. Ыҥырыылаах ыалдьыт элбэх дьарыктааҕа сөхтөрдө. Ол курдук, кини «Голос» диэн ырыа устуудьуйатыгар 3 сааһыттан дьарыктанар, «Сыдьаай» киинэ оскуолатыгар уһуйуллар, ангылычаан тылын дириҥэтэн үөрэтэр, кинигэ ааҕарын ордорор.
Бэйэтин саастыылаахтарыгар холобур буолар кыыс ийэ тыл сайдыытыгар сэмэй кылаатын киллэрэр. Ол курдук, «Саха» НКИХ сахалыы ойуулуктарын саҥардар, тэттик да, уһун да кээмэйдээх киинэлэргэ уһуллубут, «Тэтим» араадьыйаҕа оҕолор биэриилэрин ыытыһар, саха тылынан ыытыллар араас бырайыактарга кылаас чаастарыгар көхтөөхтүк кыттар. Соторутааҕыта ийэтин кытта толкуйдаабыт «Һөҕүҥ» диэн челленджтэригэр Ил Дархан Айсен Сергеевич Николаев уһуллубут.
Айыына ситиһиитэ элбэх. Онтон биир сүрүнэ – былырыын «Блогема» диэн улахан бириэмийэ «Бастыҥ блогер оҕо» анал аатын ылыыта.
***
Көрсүһүү тэрийээччилэрэ Айыынаҕа ыҥырыыларын ылынан кэлбитигэр махталларын тиэрдэллэр. Итиэннэ саха тылын сайыннара турарыгар, үөрэҕэр уонна айар эйгэтигэр өссө элбэх ситиһиилэри, саҥа бырайыактары баҕараллар.
«Төрөөбүт тылбытын харыстыаҕыҥ, сайыннарыаҕыҥ уонна кэлэр көлүөнэлэргэ тиэрдиэҕиҥ! Сахалыы саҥарыаҕыҥ, сахалыы суруйуоҕуҥ, сахалыы толкуйдуоҕуҥ!» – диэн ыҥырар «Маяк» бибилэтиэкэ кэлэктиибэ.
Сонуннар
Ордук ааҕаллар
