«Айыы кыһатыгар» регионнар икки ардыларынааҕы олимпиада ыытылынна

Ааспыт нэдиэлэҕэ «Айыы кыһата» национальнай гимназия базатыгар Сибиир уонна Уһук Илин норуоттарын төрөөбүт тылларын регионнар икки ардыларынааҕы  олимпиадаларын сүүмэрдиир түһүмэҕэ буолла.

Олимпиадаҕа Саха сириттэн, Алтай өрөспүүбүлүкэтиттэн, Башкортостантан, Бурятияттан, Татарстантан, Тываттан, Хакасияттан уонна Кемеровскай уобаластан 9-11 кылаас үөрэнээччилэрэ кэлэн кытыннылар. Олимпиада Алтай өрөспүүбүлүкэтин үөрэҕириигэ уонна билимҥэ министиэристибэтин тэрийиитинэн буолла.

Манна үөрэнээччилэр төрөөбүт тылларыгар уонна култуураларыгар билиилэрин бэрэбиэркэлиир онлай-тургутугу аастылар. Ордук элбэх баалы ылбыт олимпиада сүүмэрдиир түһүмэҕин кыайыылаахтара муус устар 27-30 күннэригэр Горно-Алтайскайга ыытыллар олимпиадаҕа баран сирэй кыттыахтара.