Айылҕа сэдэх көстүүтэ – 16 төбөлөөх сардаана

Саха сирин Кыһыл кинигэтигэр киирбит кэрэ сибэкки маннык сиэдэрэйдик үүнэрин билэр этигит дуо?    

Бүгүн, Саха сиригэр Сардаана сибэкки күнүгэр, айылҕа сэдэх көстүүтүн хаартыскаҕа түһэрэн үйэтиппит Инга Валерьяновна Хомподоева «Киин куорат» ааҕааччыларыгар ол умнуллубат түгэни ахтан-санаан ааста:

– Ити сайын Эльзалаах Марина эбэлэригэр, эһэлэригэр Ленскэй оройуонун Нотуора нэһилиэгэр сынньана тиийбиттэрэ. Ол саҕана кинилэр «Научное лето онлайн» бырайыакка дьарыктаналлара. Нотуора үүнээйилэрин чинчийэр, кэтээн көрөр этибит. Интэриэһинэйи булбуппутун хаартыскаҕа түһэрээччибит.

Биир үтүө күн үгэспитинэн айылҕаҕа тахсыбыппыт. Сардаана тыллыбыт кэмэ, суол кытыыта кып-кыһыл этэ. Ол сылдьан Кырдай уһуга диэн сиргэ ити 16 төбөлөөх сардаананы булан ылбыппыт. Уга үрдүк буолан, ыраахтан кыһыл былаат курдук кыыһан турара. Чугаһаан көрбүппүт, умнаһа уп-улахан, дьиктитэ диэн, 16 төбөлөөх.

Айылҕа барахсан икки атахтаахха тугу-тугу утары уумматаҕа баарай?! Бу иннинэ «Киин куорат» Таатта Чычымаҕар сардаана остуоруйаҕа курдук хойуутук үүммүтүн суруйан турар. Ону манна киирэн аах: https://kiinkuorat.ru/articles/ner-da-buolar-ebit