Айсен Николаев уонна Евгений Григорьев туристарга аналлаах инфраструктураны билистилэр

Өрөспүүбүлүкэ Ил Дархана Айсен Николаев уонна куорат баһылыга Евгений Григорьев бу күннэргэ киин куорат туристическай инфраструктуратын көрдүлэр.
Бастакынан саҥа тутуллуохтаах «Кырдьаҕас куорат–2» историко-култуурунай бырайыак миэстэтин көрдүлэр. Бырайыак  55 уонна 55А кыбаарталлар инфраструктураларын тупсарарын таһынан, былыргы Дьокуускайы кытта билиһиннэрэр миэстэ буолуохтаах. 
Куорат маастар-былаанын быһыытынан, үлэ быйылгыттан саҕаланыахтаах. Олорор дьиэлэри, атын социальнай эбийиэктэри таһынан 250 миэстэлээх оскуола былааннанар. 
Евгений Григорьев бэлиэтээбитинэн, маныаха өрөспүүбүлүкэ бырабыытлыстыбатын кытта нуорма-быраап аактата баттанан, чугастааҕы кэмҥэ тутуу министиэристибэтин кытта сөбүлэҥ түһэрсиллээри турар. Тутууну АРТ МУТ ыытар. Бырайыагы олоххо киллэрии иитинэн Крупская, Чепалов, Строд уонна Ярославскай уулуссаларыгар уопсайа 4,3 км усталаах кэрчиккэ өрөмүөн, саҥардыы үлэтэ ыытыллара былааннанар.

Баһылык этэринэн, уулусса-суол ситимин тупсарыы нэһилиэнньэҕэ эрэ буолбакка, туристарга куттала суох уонна табыгастаах усулуобуйаны олохтуоҕа. «Бырайыак сүрүн чааһынан былыргы тутуулары, история нэһилиэстибэтин өрөмүөннээһин, чөлүгэр  түһэрии буолар», – диэтэ Евгений Григорьев. Бэлиэтээн эттэххэ, куорат бу оройуонугар биллиилээх атыыһыт Манныаттаах Уола уонна худуоһунньук Валериан Васильев олорбут дьиэлэрэ баар. 
«Кырдьаҕас куорат–2» бырайыак биир уратытынан быыстапка-музей, спорт, сынньалаҥ, креативнай индустрия, маастардар үлэлиир сирдэрэ тус-туһунан зоналарынан тэриллэллэрэ буолуоҕа. Онон Дьокуускай куорат төрүттэммитэ 400 сылын көрсө «Кырдьаҕас куорат–2» олорор оройуон эрэ буолбакка, куорат туристическай киинэ буолар аналлаах. 
Айсен Николаев уонна Евгений Григорьев бу күн салгыы 13 этээстээх «Космос» гостиница тутуллуохтаах сирин көрүлэр. 4* сулустаах, 148 хостоох гостиница комплекса Чернышевскай уул., 8/3 2027 сылга үлэҕэ киириэҕэ. «РИК Плюс АУо («Центр» УК ХЭТ) дириэктэрэ Айталина Трофимова бэлиэтииринэн, бу өрөспүүбүлүкэҕэ суох бөдөҥ гостиниуца буолуоҕа. 

Бүгүҥҥү күҥҥэ манна бары инженернэй чинчийиилэр, археологическай үлэлэр түмүктэнэн, тутуу бырайыага судаарыстыбаннай экспертизаны ааһар.
Үһүс эбийиэгинэн Ленин пр., 27 тутуллуохтаах 120 миэстэлээх, 16 этээстээх гостиница турар сирэ буолла. Тутууну көҕүлээччинэн  «Алмазэргиэнбаан» АКБ буолар. «Алмазэргиэнбаан» АУо салайааччыта Николай Долгунов иһитиннэрбитинэн, 2023 сылтан бырайыак концепт-дизайна, бизнес-былаана уонна үбүн-харчытын суоттааһына саҕаламмыт. 2025 сылтан бырайыак-смета докумуона оҥоһуллан, инвестор быһаарыллан, тутуу саҕаланыахтаах, 2027 сылга үлэҕэ киириэхтээх, диэн иһитиннэрэр Олохтоох дьаһалта пресс-сулууспата.