Айсен Николаев салайааччылар хамнастарын судаарыстыбаннай эбийиэктэр хаһаайыстыбаннай туруктарыгар тэҥнииргэ ыҥырда

«Кэнники кэмҥэ өрөспүүбүлүкэҕэ оҥоһуллубут аныгы материальнай базаны салайыы экэнэмиичэскэй көдьүүһүн үрдэтиэх кэриҥнээхпит. Онуоха салайааччылар хамнастара судаарыстыбаннай уонна муниципальнай тэрилтэлэр хаһаайыстыбаннай туруктарыгар дьүөрэ буоларын курдук, болҕомтолоохтук сыһыаннаһан, олохтуохха наада. Бу маны спорт уонна култуура эйгэлэригэр эрэ буолбакка, бүтүн судаарыстыбаннай секторга сыһыаннаан этэбин», – диэтэ Айсен Николаев.

Ил Дархан култуура эбийиэктэригэр сылдьыы көрдөрүүтэ эбиллибитин бэлиэтээн туран, эбийиэктэри туһаныы сөпкө туһаныллыахтааҕын таарыйда. Ол курдук, култуура араас тэрээһиннэригэр, култуура тэрилтэлэригэр сылдьыы эбиллэн, 2025 сыл түмүгүнэн, 24 мөлүйүөҥҥэ тиийбит. Көрдөрүү сыллата эбиллэн иһэрин эттэ. “Биллэн турар, сүҥкэннээх сыыппара. Ол аата, салаа экэнэмиичэскэй көрдөрүүтэ, туруга эмиэ итини кытта тэҥинэн үрдээн, тупсан иһиэхтээх. Сынньанарга сэҥээрдэр, көҕүлүүр култуура эйгэтэ экэниэмикэни тупсарарга дьоһун кылааты киллэриэхтээх. Биһиги тутар, саҥардар, тупсарар инфраструктурабыт онно туһалыахтаах», –
диэн тоһоҕолоон бэлиэтээтэ. Итинник көстүү спорт эбийиэктэригэр эмиэ бэлиэтэнэрин иһитиннэрдэ. Күн бүгүн Саха сирин хас биирдии үһүс олохтооҕо физкултууранан, спордунан дьарыктанарын, спорт тэрээһиннэригэр үтүмэн үгүс киһи сылдьарын үллэһиннэ.