Айсен Николаев белорусскай тиэхиньикэни Саха сиригэр атыылаһары кэҥэтэр туһунан кэпсэттэ

Минскэй куоракка «ИННОПРОМ. Беларусь» диэн аан дойдутааҕы быыстапка буола турар. Онно сырытта уонна модун тиэхиньикэни оҥорон таһаарар тэрилтэлэр салайааччыларын — «БЕЛАЗ» ААУо генеральнай дириэктэрэ Сергей Лесины уонна «Амкодор» ААУо генеральнай дириэктэрэ Александр Ефимовы — кытта көрсөн кэпсэттэ.

Кэпсэтии сүрүн тиэмэтэ — Саха сиригэр  тиэхиньикэни аҕалыыны кэҥэтии уонна хостуур бырамыысыланнаска робот-техникалары туһаныыга бииргэ үлэлэһии туһунан буолла.

«Биһиги БЕЛАЗтыын уһун кэм устата бииргэ үлэлэһэн кэллибит, кинилэр оҥорон таһаарар массыыналарын биир көхтөөх атыылаһааччыта буолабыт. Саха сиригэр тыһыынча кэриҥэ манна оҥоһуллубут улахан массыына үлэлиир. Быыстапкаҕа биһиги беспилотнай карьернай тэриллэр тустарынан эмиэ кэпсэттибит. "Амкодор" суол оҥорор уонна хомунаалынай салааҕа туттуллар тиэхиньикэлэрэ биһиги усулуобуйабытыгар барсалларын, эрэллээхтэрин бириэмэ көрдөрдө. МАЗ собуотун кытта биһиги салгыы үлэлиибит: чугас кэм иһинэн Дьокуускайга  саха тыйыс тымныытын тулуйар гына уларытан оҥоһуллубут оптуобус кэлиэҕэ», — диэн Айсен Николаев эттэ.