«Айкуо» сериалга доҕордоһуу, таптал тиэмэтэ

Ол курдук, ааспыт 2024 сыл саҥатыгар «Эн эрэ» диэн психологическай ис хоһоонноох дьиэ кэргэн драматын кэрэхсии көрбүппүт. Ити сыл кыһыҥҥы кэмигэр «Аламай таас» диэн алмаас промышленнаһыгар үлэлии барарга угуйар ыччакка аналлаах бастакы сиэрийэни эмиэ биир тыынынан көрөн ааспыппыт.

Сахалыы сиэрийэни көтүппэккэ көрөр, өрүү саҥаны күүтэр дьоҥҥо быйылгы дьылга анаан сериал хампаанньа үлэһиттэрэ көрөөччүлэригэр биир олус кэрэхсэбиллээх «Айкуо» диэн киинэни күөх экран нөҥүө бэлэх ууннулар. Киинэ сынарыыһа Октябрина Шестакова. Киһи аҥаардас аатыттан даҕаны тута биһирии истэр. «Айкуону» саҕаланыаҕыттан бүтүөр диэри биир тыынынан көрдүм. Устудьуоннуур кэм – киһи олоҕор саамай умнуллубат дьоллоох түгэн. Бэйэ саастыылаахтары кытары көрсүһүү, бастакы таптал иэйиитэ. Ханнык баҕарар уус-уран айымньы араас сытыы тиэмэни хабар эбит буоллаҕына, киинэ эмиэ туһунан кистэлэҥнэрдээх буолар.

«Айкуо» сериалга устудьуон олоҕо, ону ааһан кыһалҕата ырылхайдык көстүбүт. Ордук чуолаан билиҥҥи устудьуон уратыта таарыллыбыт. Ол курдук, устудьуон үөрэҕин таһынан үлэҕэ тус сыһыана, уһуйааччы куратордыыр бөлөҕөр болҕомтолоох көрүүтэ-истиитэ, үрдүк үөрэх кыһатын аныгы кэрэ эйгэтэ, бэл диэтэр уопсай дьиэ биир тутаах үлэһитэ оҕолорго кытаанах дьиссипилиинэтэ уонна устудьуоннар бэйэ-бэйэлэригэр сыһыаннара көрөөччү хараҕын далыгар наһаа сытыытык көһүннэ.

Манна сүрүннээн биир суолга тохтуом этэ. Сериалга доҕордоһуу уонна таптал тиэмэтэ бэлиэ миэстэни ылар. Айкуо – киинэ сүрүн дьоруойа, уйан дууһалаах, эйэҕэс дьүөгэ, устудьуон оҕо сиэринэн актыбыыс, олоххо көхтөөх, үлэһит диэн көрөөччү сыаналыыр. Кини устудьуоннуур кэмин истиҥ дьүөгэтэ Сарыада буолар. Сарыада киһи быһыытынан сүрдээх элэккэй, аламаҕай майгылаах кыыс. Айкуо тус олоҕор төһө даҕаны уустуктары көрүстэр, хорсун санаатын ыһыктыбат уонна хата бииргэ үөрэнэр чугас дьүөгэлээх буолан санааларын куруук бииргэ үллэстэллэр, көмөлөсүһэллэр. Сериал сүрүн дьоруойа айылҕаттан ыллыыр талааннаах. Устудьуоннар куонкурустарыгар кыттан бар дьон биһирэбилин ылар. Онно Сарыада күүс-көмө, өйөбүл буолбута олус суолталаах уонна хайҕаллаах.

Киһиэхэ саамай күндү киһитэ ийэтэ. Сериал бүтэһигэр Айкуо Эрэл дьонугар тиийбитэ ийэтэ баар буола түһэр. Кыыс ыарахан кэмигэр ордук чугас киһитэ аттыгар баар буолбута кини олоҕор наһаа улахан суолталаах. Бу сыллар тухары тута сылдьыбыт хом санаатын ийэтигэр аһаҕастык хайдах баарынан кэпсиир. Онуоха ийэтэ кинини уруккутун курдук таптыырын, күндүтүк саныырын биллэрэр. Онон, бу түгэҥҥэ ийэ оҕотугар хардарыта сыһыаннара көстөр. Тиһэҕэр иккиэн биир суолга турунуулара – өйдөһүү буолар.

Онон, «Айкуо» сериалы олус умсугуйан туран астына көрдүм. Бу киинэҕэ чуолаан доҕордоһуу уонна таптал тиэмэтэ ордук тоҕоостоох. Киһи устудьуоннуур кэмигэр элбэх доҕоттору көрсөр. Олортон хас эмэ санааҕын атастаһар, эйигин өйдүүр-өйүүр доҕоттордоох буоллаххына ол – дьол. Оттон оҕо олох киэҥ аартыгар үктэнэн аҥаардас устудьуоннуур кыһалҕатынан эрэ муҥурдаммакка чугас дьонун эмиэ саныахтаах, таптыахтаах, харыстыахтаах уонна сибээһин өрүү тутуохтаах.