«Айболит луохтуур», «Суундьукку», «Таракаанырба»...

Биирдэ кини уолун кытта Петербургтан поеһынан айаннаан испиттэр. Оҕото улаханнык ыалдьыбыт эбит. Ол иһин кырачаанын аралдьытаары, крокодил туһунан остуоруйаны айан кэпсээбит. Уолчаана бэркэ болҕойон истибит.

Хас да күн ааспыт. Корней Иванович ол туһунан таһыччы умнан сырыттаҕына, оҕото санаппыт. Кырачаан аҕата тугу кэпсээбитин ымпыгар-чымпыгар диэри өйдөөн хаалбыт эбит. Ити курдук «Крокодил» остуоруйа күн сирин көрбүт уонна 1917 сыллаахха бэчээттэммит.

«Мойдодыр» хоһоону билэҕит? Суруйааччы тапталлаах кыыһа кыра сылдьан суунуон баҕарбат, сырыы аайы ый-хай бөҕөнү түһэрэр эбит. Онон айымньы сюжета таҕыстаҕа ол. Манна даҕатан эттэххэ, Арассыыйа уонна Белоруссия куораттарыгар Мойдодырга аналлаах пааматынньыктар бааллар. Холобур, Москва Сокольники пааркатыгар, Песочнай аллеяҕа турар.

Алтынньы 15 күнүгэр Аан дойдутааҕы илии суунуу күнэ бэлиэтэнэр. Бу күн оҕолорго Мойдодыр ыалдьыттыыр, араас аахсыйалар биллэриллэллэр, илии суунар туһалааҕын кэпсииллэр. 

Чуковскай олоҕуттан интэриэһинэй чахчылар:

1. Кини дьиҥнээх аата – Николай Васильевич Корнейчуков. Өрөбөлүүссүйэ кэнниттэн аатын уларыппыт, Корней Иванович Чуковскай диэн буолбут.

2. Сэбиэскэй Сойууска уонна Арассыыйаҕа саамай элбэхтик бэчээттэнэр ааптар. 2017 сыл түмүгүнэн кини кинигэлэрэ 2 мөлүйүөнтэн тахса ахсаанынан бэчээттэнэн тахсыбыттара бэлиэтэнэр.

3. Кини оҕолоро Николай Корнеевич Чуковскай уонна Лидия Корнеевна Чуковская эмиэ суруйааччы буолбуттара.

4. Чуковскай айымньыларынан 30-ча мультик уонна уус-уран киинэ уһуллубут.

5. Талааннаах тылбаасчыт быһыытынан киэҥник биллибитэ. Артур Конан Дойл, Редьярд Киплинг, Даниэль Дефо, Герберт Уэллс уонна да атын ааптардар айымньыларын нууччалыы саҥардыбыта.

6. Оҕо сааһын баҕа санаата – Австралияҕа олоруу. Ол иһин английскай тылы баҕа өттүнэн үөрэппит.

7. 2014 сыллаахха Санкт-Петербург куоракка саҥа аһыллыбыт уулуссаҕа Корней Чуковскай аатын иҥэрбиттэр. 

8. 1992 сыллаахха сахсырҕа саҥа көрүҥүн «муха-цокотуха» диэн ааттаабыттар.

Биһиги суруйааччыларбыт Корней Чуковскайы сахалыы саҥардыбыттара. Ол курдук, Архип Абаҕыыныскай «Суундьукку» («Мойдодыр»), Константин Туйаарыскай «Таракаанырба» («Тараканище»), «Сөдүөрэ үлүгэрэ» («Федорина горе»), С.А. Саввин-Күн Дьирибинэ «Айболит луохтуур» («Доктор Айболит»)  айымньыларын тылбаастаабыттара.