«Айар Уустар» — «Анимур-2025»

Алтынньы 30 – сэтинньи 2 күннэригэр Хабаровскай куоракка «Анимур-2025»  норуоттар икки ардыларынааҕы анимационнай киинэ бэстибээлэ 4-с төгүлүн ыытылынна. Санатар буоллахха, бу бэстибээл Уһук Илин уокурукка кэмиэрчэскэй анимацияҕа көрүү куонкуруһунан ыытыллар бастакы киэҥ далааһыннаах тэрээһин быһыытынан, эдэр аниматордары көҕүлүүр уонна өйүүр соруктаах, бастакытын 2022 с. ыытыллыбыта. Манна Арассыыйа, Азиатскай-Тихоокеанскай эрэгийиэн уонна соҕуруулуу-илиҥҥи Азия дойдуларын аниматордара кыттыыны ылаллар.

Тэрийээччилэр бэлиэтээбиттэринэн, быйылгы куонкуруска барыта 414 сайаапка киирбититтэн 183 үлэ шорт-лиискэ талыллыбыт. Манна дьүүллүүр сүбэ сүүмэрдээһинин ааһан Дьокуускайдааҕы «Айар уустар» креативнай индустриялар колледжтарын анимация группатын 2-с кууруһун устудьуоннара Арианна Иванова, Дайаана Кынтоярова уонна Ольга Уварова «Калинка-малинка» ойуулуктарынан кытыннылар. Бэстибээл чэрчитинэн ыытыллар маастар-кылаастарга сырыттылар, питчиҥҥэ (өйөөччүлэри булар соруктаах бырайыагы, идиэйэни көрдөрүү, билиһиннэрии) икки бырайыактарын кэпсээтилэр. Кинилэри колледж анимацияҕа преподавателэ Анна Слепцова салайан илдьэ сырытта. «Киин куорат» «Айар Уустар» хамаандаларын кытта, өссө кинилэр Хабаровскайга сылдьар кэмнэригэр, сибээскэ тахсан бэстибээл хайдах ааспытын сураспыта.  

Анна Алексеевна Слепцова – креативнай индустриялар колледжтарын анимацияҕа преподавателэ:

– Бэстибээли үөрүүлээхтик арыйыы кэннэ үөрэтэр куурустарга сылдьыбыппыт. Кыргыттар питчиҥҥэ бэлэмнэммиттэрэ. «Киноклуб как ресурс личностного роста» курдук педагогтары үөрэтэр куурустар олус интэриэһинэйдик аастылар.

Биһиги кэммитигэр бүтүн көлүөнэ олоҕу көрүүтүгэр тэлэбиидэнньэ дьайар кыахтаах эбит буоллаҕына, билиҥҥи оҕо тэлэбиисэри сэдэхтик көрөр, ол оннугар интэриниэти, талбыт контенын көрөрүгэр толору кыах баар. Ол үрдүнэн оҕолорбут хааччахтаах билиилээхтэр. Биири сэргээн көрдөхтөрүнэ, ситим кинилэргэ бу көрбүт эрэ тиэмэлэринэн контены булан көрдөрөр. Оттон киинэ кулуубугар кыттыгас киинэ көрүүтүн сэргэ киинэни, ойуулугу ырытыы ыытыллар буолан, оҕолорго сиэр-майгы өттүнэн хайысханы ыйарга, олоҕу көрүүлэрин кэҥэтэргэ, култуураҕа сөбүлээһини иҥэрэргэ кыах бэриллэр. Аныгы кэмҥэ сиэргэ-майгыга сөптөөх хайысханы ыйан биэрии тиийбэтиттэн, оҕолор тус бэйэлэригэр бүгэллэриттэн туохтан барытыттан дьиксинэр буола улааталлар дии саныыбын.

Питчинг иннинэ кыргыттар Прокопий Уляшов, Анна Морякова, Глеб Федоров уо.д.а.  анимацияҕа сыһыаннаах лиэксийэлэригэр сылдьыбыттара. Үөрэтэр маастар-кылаастар, лиэксийэлэр ВГИК Хабаровскайдааҕы филиалыгар ыытылыннылар. Хамаандабыт оҕолоро барытын олус сэргии иһиттилэр, бэриллэр сорудахтары көхтөөхтүк толордулар, туох эмэ саҥаны биллэхтэринэ олус үөрэллэр. Лиэксийэлэр кэннэ «Мечталёт» устуудьуйаны кытта көрсүһүү буолбута. Устуудьуйа үлэһиттэрэ хамаандаларын билиһиннэрбиттэрэ, бырайыактарын кэпсээбиттэрэ.

«Союзмультфильм» ыыппыт квиз оонньуутугар бэрт кыранан кыайыыны ситиспэтибит диэн бэлиэтээн ааһар тоҕоостоох. Ол курдук, икки бастакы туур түмүгүнэн инники сылдьыбыт буоллахпытына, түмүктүүр түһүмэххэ педагогтар хамаандаларыгар баһыйтардыбыт. Инньэ гынан квизкэ 2-с миэстэ буоллубут.

Бэстибээл тиһэх күнүгэр ыытыллыбыт питчиҥҥэ «Айар уустар» хамаандалара бэйэлэрин бырайыактарын билиһиннэрбиттэр. Ол туһунан DVHAB.RU Хабаровскайдааҕы таһаарыытыгар Ольга Кошелева суруйуутугар маннык бэлиэтээбит:

«/…/А команда колледжа креативных индустрий «Айар Уустар» из Якутии рассказала о будущем мультфильме «Тепло». На проект ребят вдохновили… трубы в Якутске. В регионе, где вечная мерзлота покрывает практически всю территорию, коммуникации вынесены наружу. По словам автора Ольги Семеновой, ей захотелось провести параллель между теплыми трубами, которые обогревают людей в минус 50 и теплом человеческой души, которое тоже очень важно для нормальной жизни.

Экспертное жюри высоко оценило уровень подготовки аниматоров, полет их фантазии и глубину мысли/.../».

Устудьуоннар «Анимур» бэстибээл туһунан санааларын бу курдук үллэстэллэр:

Ольга Уварова:

– Олус интэриэһинэй уонна кэрэхсэбиллээх бэстибээл буолан ааста. Анимация уонна анимациянан киинэ эйгэтигэр сыһыаннааҕы олус элбэҕи, саҥаны биллибит, көрдүбүт. Мультипликация уонна киинэ эйгэтигэр өссө чугаһыырга ойуулугу айан, таҥан оҥоруу туох баар мындырын, чымпыгын ырытарга диэн сорук туруоруллубута. Элбэх интэриэһинэй уонна талааннаах питчинг кыттыылаахтарын кытта билсистибит, бэйэбит кыахпытын көрдөрдүбүт, уопуппутун атастастыбыт. Бэстибээлтэн умнуллубат өйдөбүлү тутан хааллыбыт. Мир-Мур-Анимур!

Дайаана Кынтоярова :

– Хабаровскайга сырыыбытын олус астынным! Куорат олохтоохторо олус эйэҕэстэр уонна аламаҕайдар. Оттон «Анимур» бэстибээл үгүс үтүө иэйиини уонна элбэх уопуту бэлэхтээтэ. Элбэх кыттааччыны, идэтийбит дьону кытта билсиһиим, алтыһыым, дьон иннигэр толлубакка, кыбыстыбакка саҥарарбар көмөлөстө. Күнүн ахсын ыытыллыбыт көхтөөх үгүс тэрээһиҥҥэ сылдьан барыта бүтэ охсубутун өйдөөбөккө да хаалбытым, хайдах эрэ харааста да санаабытым.  Быһата, барытын олус диэн астынным. Маҕаһыыҥҥа астара биһиэниттэн быдан чэпчэкитигэр тиийэ.

Хаартыскалар: «Анимур» бэстибээл ВКонтакте официальнай сирэйиттэн уонна дьоруойдар тус архыыптарыттан