Атыыланар сир межеваниеламмыт буолуохтаах

Кулун тутартан сир учаастагар сыһыаннаах өссө биир уларыйыы киириэҕэ. Ол курдук, хамсаабат хапытаал кэлим судаарыстыбаннай реестиригэр (ЕГРН) сир учаастагын кыраныыссаларын туһунан чахчы суох түгэнигэр, ол сиргэ сыһыаннаах атыы-тутуу мантан инньэ регистрацияламмат. Ону тэҥэ межеваниеламматах сири кадастровай учуокка туруоруу уонна онно баар тутууну, ситэриллэ илик эбийиэги да бас билиигэ суруйтарыы кыаллыбат буолар.
Росреестр быһаарбытынан, маннык ирдэбил туһааннаах сир ханнык категорияҕа киирсэриттэн, ханнык көрүҥ туһаныыга көҥүллэнэриттэн тутулуга суох барытыгар дьайар. 
Сонун киллэрии төрүөтүн маннык быһаарбыттар. Холобур, учаастак атыылыыр киһи сир атыылаһааччыга атын, туора киһи сирин көрдөрөрө эбэтэр “бу учаастакка киирсибэт сир хабыллан хаалбыт” диэн этэрэ баар буолар. Оннук түгэҥҥэ атыылаһааччы кырдьыгын суукка быһаарсарга күһэллэр. Аны, сир чопчуламмыт кыраныыссата ыйыллыбатаҕыттан сылтаан сыстыһа сытар сирдээх дьон ортотугар үгүс мөккүөр күөдьүйэр. Ону таһынан кыраныыссата чопчуламматах учаастакка бэлиэр дьиэ туттубут кэннэ, онтуҥ аттынааҕы киһи сиригэр тутуллан хаалбыт эбэтэр тутууга көҥүллэмэт сиргэ түбэспит буолуон эмиэ сөп этэ.
Онон, сири-уоту атыылаһыах, атыылыах да иннинэ тустаах учаастак кыраныыссата ЕГРН-ҥа киирбитин-суоҕун чопчулаһыы наада. ЕГРН-тан выписка сакаастаан эбэтэр Ростреестр публичнай кадастровай каартатыгар киирэн бэрэбиэркэлиэхтээх эбиппит. Онуоха туох да төлөбүр ирдэммэтэ, ким баҕалаах киирэн көрүөн сөбө этиллэр. 
Өскөтүн ЕГРН-ҕа сир кыраныыссата бэлиэтэммэтэх түгэнигэр, кадастровай инженер көмөтүнэн учаастак (территория) межевой былаанын оҥотторон баран, сир кыраныыссатын туһунан сибидиэнньэни МФЦ нөҥүө ЕГРН-ҥа киллэттэриллиэхтээх.