Атыылаһыах иннинэ сымыйа эмп буолбатаҕын хайдах билиэххэ сөбүй?

Бастатан туран, дьиҥ, оригинал препарат буоларын туһугар эми официальнай аптекалартан уонна бөдөҥ аптека тиһиктэрин биир оннук официальнай саайтыттан сакаастаан ылар ордук. Маркетплейстрга сымыйа (подделка) эмп баар буолуон сөбө этиллэр.

Туохха болҕойуохха?

Ылыахтаах эмкит хаҕын сыныйан көрүҥ. Алдьамматах, ханан да аһылла сылдьыбатах, маркировката, серията, туттуллар болдьоҕо чуолкай гына суруллубут, үчүгэйдик буолуохтаах. Алдьаммыт, аһыллыбыт упаковкалаахтан – тута аккаастаныахха.

 «Честный знак» диэн сыһыарыы туһалыа.

Истэ илик дьоҥҥо кэпсээтэххэ, 2020 сылтан бэттэх хас биирдии эмп Data Matrix уникальнай, хатыламмат кодунан маркировкаланара булгуччу ирдэнэр буолбута.

Ол код көмөтүнэн  дьиҥ (оригинал) дуу, сымыйа эмп дуу буларын билэргэ «Честный знак» диэн төлөпүөҥҥэ хачайданар, босхо сыһыарыы көмөлөһөр. Ону хайаан да хачайданыҥ. Эмп эрэ буолбакка онно атын табаардар эмиэ бааллар, онон олус наадалаах сыһыарыы. Ханнык төлөпүөннээххититтэн тутулуктанан, Rustore, Google pley, AppGallery эбэтэр App Stor киирэн, хачайдыыр кыахтааххыт. Ону сэргэ көмпүүтэргитин холбоон, интэриниэккэ холбонон, честныйзнак.рф диэн официальнай саайка да киирэн, бэрэбиэркэлиэххэ сөп.

Сыһыарыыга киирэн, туһааннаах эми таллаххытына онтугун анныгар  «Товар проверен» диэн суруктаах буолуохтаах.  Оччотугар сээбэҥнээһинэ суох, хорсуннук ылаҕыт.

Ардыгар «Лекарство запрещено к продаже» диэн тахсан кэлиэн сөп. Оччотугар, биллэр турар, ылар табыллыбат.

Ону сэргэ «Код не найден» диэн тахсааччы. Дьэ, оннук түгэҥҥэ эмиэ ылбатах көнө Сороҕор сыһыарыы “бу эмп туттуллар болдьоҕо ааспыт” диэн эмиэ сэрэтиэн сөп.

Өссө биир ньыма

Росздравнадзор официальнай саайтыгар киирэн, наадыйар эмкит аатын суруйан атыыттан туоратыллыбытын биитэр атыыга баарын билиэххитин сөп. Ону таһынан ГРЛС диэн баар – эмтиир сириэстибэлэр судаарыстыбаннай реестирдэрэ диэн ааттанар.  

Арай ылбыт эмиҥ подделка буоллун?

Эмп чиэгин уонна хаҕын быраҕыллыа суохтаах. Эми атыылаабыт аптека сэбиэдиссэйин аатыгар эбэтэр атыылаабыт маркетплейс туһанааччыны өйүүр сулууспатыгар хайаан да суругунун претензия  суруллар. Атыылаһаргар ылбыт чиэккин хаартыскаҕа түһэрэн эбэтэр сканердаан баран, сымыйа эмп иһин төлөппүт харчыларын төннөрөллөрүн туруорсар толору бырааптааххын.

Итинэн тохтоон хаалбакка,  бу салааҕа сыһыаннаах кэтээн көрөр уорганнарга биллэриэх тустааххын. Ол эбэтэр, Роспотребнадзорга биитэр Росздравнадзорга.

Фальсификаты атыылаабыта билиннэҕинэ, туһааннаах тэрилтэ (юридическай сирэй) РФ КоАП 6.33 ыстатыйатын 1-кы чааһыгар олоҕуран, 1 мөл. солкуобайтан саҕалаан, 5 мөл. солк. тиийэ ыстырааптанар. Тоҕо диэтэххэ, сымыйа эмп киһи олоҕор кутталы үөскэтэр, доруобуйа туругун аһааҕырдар кыахтаах, онон күүскэ уодьуганнанар.

Бу маннык сүбэни Объясняем. РФ суруйар. Билиҥ, туһаныҥ. Ким билиилээх – ол сэбилэниилээх