Атыылаһыах иннинэ эмп дьиҥ эмп буоларын хайдах билиэххэ сөбүй?

Дьиҥ, оригинал препараттары официальнай аптекалартан уонна бөдөҥ аптека тиһиктэрин биир оннук официальнай саайтыттан сакаастаан ылар ордук. Маркетплейстрга подделкаҕа түбэһиэххэ сөбө этиллэр.

Туохха болҕойуохха?

Бастакы уочарат эмп хаҕын сыныйан көрүҥ. Алдьамматах, ханан да аһылла сылдьыбатах, маркировката, серията, туттуллар болдьоҕо чуолкай гына суруллубут буолуохтаах. Алдьаммыт, аһыллыбыт упаковкалаахтан тута аккаастаммыт көнө.

Оригинал буоларын билэргэ абыраллаах «Честный знак» диэн сыһыарыы баар. Ону туһаныахха сөп.

Истэ илик дьоҥҥо санатар буоллахха, 2020 сылтан бэттэх хас биирдии эмп Data Matrix уникальнай, хатыламмат кодунан маркировкаланара булгуччулаах буолбута.

Ол коду бэрэбиэркэлэтэн,  дьиҥ баар дуу, сымыйа эмп дуу буларын билэргэ «Честный знак» диэн төлөпүөҥҥэ хачайданар босхо сыһыарыы көмөлөһөр. Ону хайаан да хачайданар орудк. Эмп эрэ буолбакка онно атын табаардар эмиэ бааллар, онон олус наадалаах сыһыарыы. Ол сыһыарыыга киирэн туһааннаах эми талбыккыт «Товар проверен» диэн суруктаах буолуохтаах.  Оччотугар сээбэҥнээһинэ суох, эрэбиллээхтик ылаҕыт. Ардыгар «Лекарство запрещено к продаже» диэн тахсан кэлиэн сөп. Оччотугар, биллэр турар, ылар табыллыбат. Ону сэргэ «Код не найден» диэн тахсааччы. Дьэ, оннук түгэҥҥэ эмиэ ылбатах көнө Сороҕор сыһыарыы эмп туттуллар болдьоҕо ааспыт диэн эмиэ сэрэтиэн сөп.

Өссө биир ньыма

Росздравнадзор официальнай саайтыгар киирэн, наадыйар эмкит атыыттан туоратыллыбытын биитэр аптыыга баарын билиэххэ сөп. Ону таһынан ГРЛС диэн баар – эмтиир сириэстибэлэр судаарыстыбаннай реестирдэрэ диэн ааттанар.  

Арай ылбыт эмиҥ подделка буоллун?

Чиэги уонна хаҕын быраҕыллыа суохтаах. Эми атыылаабыт аптека сэбиэдиссэйин атыгар эбэтэр атыылаабыт маркетплей туһанааччыны өйүүр сулууспатыгар хайаан да суругунун претензия  суруллар, чиэги хаартыскаҕа түһэрэн, сканердаан баран, сымыйа эмп иһин төлөппүт харчыларын төннөрөллөрүн туруорсаҕын.

Итинэн тохтообоккун. Итиннэ сыһыаннаах кэтээн көрөр уорганнарга биллэриэх тустааххын. Ол эбэтэр, Роспотребнадзорга биитэр Росздравнадзорга.

Фальсификаты атыылаабыта билиннэҕинэ туһааннаах тэрилтэ (юридическай сирэй) РФ КоАП 6.33 ыстатыйатын 1-кы чааһыгар олоҕуран, 1 мөл. солкуобайтан саҕалаан, 5 мөл. солк. тиийэ ыстырааптанар. Тоҕо диэтэххэ, сымыйа эмп киһи олоҕор кутталы үөскэтэр, доруобуйа туругун аһааҕырдар кыахтаах, онон күүскэ уодьуганнанар.

Бу маннык сүбэни Объясняем. РФ суруйар.