Атыылаһааччылары албыннааһын иһин ыстарааптары 10 төгүл улаатыннарар туһунан этии киирдэ

Юридическай сирэйдэргэ этиллибит ыстараап улааппыта 500 000 солк. диэри үрдүөҕэ – бу билиҥҥи кээмэйтэн 10 төгүл элбэх.

Арассыыйа административнай быраабы кэһии туһунан кодексатын 14.7 ыстатыйатыгар уларытыы быһыытынан, биирдиилээн дьоҥҥо ыстараап 30 тыһыынчаттан 50 тыһыынча солкуобайга диэри, дуоһунастаах дьоҥҥо 100 тыһыынчаттан 300 тыһыынча солкуобайга диэри, юридическай сирэйдэргэ 200 тыһыынчаттан 500 тыһыынча солкуобайга диэри тэҥнэһиэн сөп. Көҕүлээһин ааптара дьокутаат Сергей Миронов бу ыстатыйанан ыстарааптар 2014 сылтан үрдээбэтэхтэрин, билиҥҥи суумалар быраабы кэһээччилэргэ муораҕа хааппыла буоларын быһаарда: юридическай сирэйдэр саамай элбэҕэ 50 000 солкуобайы төлүүллэр, оттон маҕаһыын салайааччылара уонна атыыһыттара – өссө кыраны.

Парламентарий этэринэн, үгүс гражданнар ырыынактарга уонна маҕаһыыннарга түөкэйдээһини өрүү көрсөллөр: кинилэри албынныыллар эбэтэр кыра табаары үрдээбит сыанаҕа атыылыыллар. Хас биирдии кэһии кыра курдук көстүөн сөп эрээри, маннык албын дьайыылар уопсай суумалара ханнык баҕарар ыстарааптан быдан улахан сөбө суох барыһы аҕалыан сөп. Миронов сокуон ылыллыыта атыы-эргиэн уонна өҥө эйгэтигэр итэҕэли үрдэтиэ диир, диэн РИА иһитиннэрэр.