Атырдьах ыйыттан үлэлээхтэр биэнсийэлэрэ үрдүөҕэ
Атырдьах ыйын 1 күнүттэн Арассыыйа Социальнай пуондатын Саха сиринээҕи салаата 96 тыһыынча үлэлиир биэнсийэлээх страховой биэнсийэтин хаттаан ааҕыаҕа (перерасчет), диэн пуонда региональнай салаатын салайааччыта Марина Герман брифиҥҥэ иһитиннэрдэ.
– Үрдээһин кээмэйэ хас биирдии киһиэхэ тус-туһунан уонна ол үлэни биэрээччи 2024 сылга төлөөбүт страховой усунуоһуттан тутулуктаах.
Ол эрээри, сокуон быһыытынан, үрдээһин кээмэйэ үс биэнсийэ коэффициеныттан ордуо суохтаах. Коэффициент кээмэйэ гражданин биэнсийэни анаппыт сылыттан тутулуктаах. Чуолаан 2025 сылга биэнсийэ коэффициенын кээмэйэ 145,69 солк. тэҥнэһэр. Гражданин мунньуллубут коэффициенын Госуслуги порталга тус кабинетын нөҥүө выписка ылан көрүөн сөп, – диэн бэлиэтиир Марина Герман.
Биэнсийэ кээмэйин уочараттаах хаттаан ааҕыы сайабылыанньата суох ыытыллар. Гражданин биэнсийэтин олоҕурбут график уонна бэрээдэк быһыытынан ылар.
Үрдээһин иитэр-аһатар киһилэрин сүтэрбиттэри эмиэ таарыйар, өскөтүн биэнсийэни анаппыт киһи тус счетугар биэнсийэ оҥорторорун саҕана учуоттамматах харчылаах түгэнигэр.
Марина Герман бэлиэтээбитинэн, үлэлээбэт биэнсийэлээхтэргэ, социальнай уонна судаарыстыбаннай биэнсийэни ылааччыларга атырдьах ыйыгар хаттаан ааҕыы көрүллүбэт. Кинилэргэ маннык үрдээһин үгэс курдук тохсунньу ыйга оҥоһуллубута.
2025 сылтан Арассыыйа Социальнай пуондатын Саха сиринээҕи салаата үлэлиир биэнсийэлээхтэр биэнсийэлэрин индексациялааһыны сөргүппүтэ. Ол эбэтэр үрдээһин үлэлээбэт биэнсийэлээхтэргэ курдук ааспыт сыллааҕы инфляция кээмэйигэр олоҕуран оҥоһуллар.
Ыйытыылаах дьон Арассыыйа Социальнай пуондатын Саха Өрөспүүбүлүкэтигэр салаатын контакт-киинигэр эрийэн билсиэххитин сөп: 8 (800) 100-00-01. Бу туһунан Ил Дархан уонна Бырабыыталыстыба пресс-сулууспата иһитиннэрэр.
Сонуннар
Ордук ааҕаллар
