Атын үүнүү туруга хайдаҕый?

Туорахтаах култуураны билиҥҥитэ 3 025,6 гааттан хомуйдулар. Бу -- уопсай ыһыллыбыт иэн 28 %-гар тэҥнэһэр. Баалабай көрдөрүү  гааттан, ортотунан, 7,9 ц кэлэр түгэнигэр 2 399 туоннаҕа тэҥнэһэр.  

Дьоммут быйыл 14 тыһ. туонна бурдугу хомуйарга суоттаналлар. Үүнүү гааттан 11.3 ц буолуон сабаҕалыыллар. Былырыыҥҥы муҥутуур көрдөрүүнү ситэр уустук буолар чинчилээх. Ол эрээри эрэл баар.

Аһаҕас уонна сабыылаах сиргэ үүнэр оҕуруот аһын 5 572,7 туоннаны хомуйбуттар (о.э. былаан 19%-а). Ити иһигэр сабыылаахтан 3 439,9 т хомуйдулар. Хомуллубут иэн кээмэйэ  —  434,6 гаа эбэтэр былаан 32 % -нын саҕа. Аһаҕас сиргэ үүнэр оҕуруот аһа 1 180,3 гааҕа олордуллубута. Орто үүнүү гааттан 128,3 ц буолбут.

Хомуур үлэтин баһыйар өттүн балаҕан ыйынан түмүктүүр сорук турар.

Бааһынай ырыынагар хаппыыста, помидор, сүбүөкүлэ, укроп, кабачок, тыква, моркуоп дэлэй. Бэл, халлаан төһө да биллэ тымныйдар, оҕурсу кытта арааһыттан баар. Ортотунан, киилэтин 250 солк. да булуохха сөп. Түһэристэххэ. Ити ырыынакка оҕурсу кг. саамай сыаналаммыта 350 солк. этэ. Муҥутуур кыра сыана 100 солк. этэ. Суордуттан, ханнык хаһаайыстыба атыылыырыттан, оҕурсу хаачыстыбатыттан тутулуктаах.

Буспут помидор 100 солк. саҕалаан (кыра кээмэйдээх), 350 солк. тиийэ сыаналанан турар. Күөҕү 120 солк. холкутук булаҕын. Биирдиилээн атыыһыттар кыра кээмэйдээҕи 50 солк. кытта биэрэллэр.

Кабачок, дьоҕус хаппыыста киилэтэ, ортотунан, 100 солк. сыаналыыллар. Олохтоох, минньигэс, буспут биэрэс киилэтэ, ортотунан, 200 -- 300 солк. иһинэн халбаҥныыр, муҥутуур үрдээбитэ 350 солк. баара. Оттон күөҕүн 120 солк. да булуохха сөп.

Тыква киилэтэ, ортотунан, 220- 250 солк. иһинэн. Кыра кээмэйдээх хаппыыста киилэтэ 100 солк. турара, кабачок кг – 100 солк.

Олохтоохтортон чуолаан куорат кытыытынааҕы Тулагы уонна Мэҥэ Хаҥалас оҕуруотун аһа дэлэччи этэ. Сыаналара да сөбүгэр. Баҕар, омос көрүүгэ эбэтэр түбэһиитэ оннук буолуон эмиэ сөп.

Ити курдук, үлэһит үтүөтэ дьон баар буолан, баҕарбыт олохтоох бородууксуйабытын ылар кыахтанан эрдэхпит. Махталы кытта үүнүүлэрэ үгүөрү, сыралара-сылбалара үтүө түмүктээх буоларыгар баҕарыаҕыҥ.

Мантан күһүн-кыһын сыана хайдах-туох буолуоҕун этэр күчүмэҕэй. Арай  былаас өттүттэн сыаната хонтуруолланар 24 көрүҥ аска дойду бүттүүнүн үрдүнэн хортуоппуй, сүбүөкүлэ, эриэппэ луук,  моркуоп, помидор, оҕурсу уонна хаппыыста киирбитин санатыахха сөп. Ол эбэтэр, бу оҕуруот астарын сыаната таһыччы үрдээбэт.