Ат сүүрдүүтүн сезонун түмүктээтилэр

Бэҕэһээ, балаҕан ыйын 26 күнүгэр, АГАТУ ипподромугар бэртээхэй ат сүүрдүүтэ буолан ааста.

Дьон- сэргэ астынан-дуоһуйан тарҕаста. Кыайан кэлбэккэ хаалбыттар, мантан аллара кыайыылаах аттары уонна биэтэги булбут бириэмэлэриҥ билсиҥ.

🏇 1600 миэтэрэ — С.М. Аржаков аатынан бириис иһин 2 саастаах, ыраас хааннаах 4 сылгы кииристэ: Кайра (Дьокуускай) — 1 мүнүүтэ 51.56 сөкүүндэнэн кэлэн, бастаата. 2 миэстэлэммит Бортэ Куо (Мэҥэ-Хаҥалас) бириэмэтэ — 1 мүнүүтэ 52.00 сөкүүндэ. 3- м миэстэ — Кыым Стар (Чурапчы) — 1 мүнүүтэ 59.31 сөкүүндэ. ✅Бирииһи — 300 тыһ. солк. Бүлүү улууһа туруорбут.

🏇 2400 миэтэрэ уһуҥҥа Тыа хаһаайыстыбатын министиэристибэтин бирииһэ турда. Манна 4 саастаах, ыраас хааннаах 7 быһый күөн улахан былдьастылар. Манна Атомик Бой (Үөһээ Бүлүү) кыайыы кынаттанна. Биэтэги 2 мүнүүтэ 35.26 сөк. булла. Аксель (Мэҥэ Хаҥалас) — 2 мүнүүтэ 37.93 сөк. кэлэн иккис буолла. Евр (Хаҥалас) — 2 мүнүүтэ 38.37 сөкүүндэнэн түмүктээн үһүс буолла. 1 кы м. — 250 тыһ. солк., 2 - с м. — 150 тыһ. солк. , 3 м — 100 тыһ. солк.бириис.

🏇 2400 миэтэрэҕэ И.И. Портнягин аатынан бириис оонньонно. Манна тупсарыллыбыт саха боруода сылгылар кытыннылар. Миэстэлэрэ маннык буолла: Кынат (Дьокуускай) — 2 мүнүүтэ 51.77 сөкүүндэнэн кэлэн, киин куоракка кыайыыны бэлэх уунна. Хабиб (Мэҥэ Хаҥалас) — 2 мүнүүтэ 52.31 сөк. кэлэн, иккистээтэ. Үһүс миэстэлэммит Уйгуура (Таатта) бириэмэтэ — 2 мүнүүтэ 53.14 сөкүүндэ. ✅Кыайыылаахтар Иннокентий Портнягин аймахтара туруорбут бириистэрин, бэлэхтэрин туттулар.

🏇 Дьэ, оттон бу сүүрдүү муҥутуур уһун дистанциятыгар — 3200 миэтэрэҕэ сүүрдүү «Национальное достояние» үрдүк аат иһин киирсиигэ ананна. Манна 4 саастарыттан үөһэ, Саха сиригэр төрөөбүт ыраас хааннаах 9 чулуу сүүрүк бастыҥ ааты ылар туһугар илин- кэлин түсүһэн, ыппыт охтуу түһүннүлэр.

Түмүгэр Мэҥэ бастыҥ быһыйа Чөмчүүк биэтэги 3 мүнүүтэ 38.38 сөкүүндэнэн кэлэн, улуус олохтоохторун, этэргэ дылы, хайаларын үрдүгэр күлүм түгэҥҥэ өрө кыыратан таһаарда. ✅Кыайыылаах бирииһэ - 1,5 мөл. сөлк.

Иккис миэстэни Дайан (Уус Алдан) ылла. Бириэмэтэ — 3 мүнүүтэ 39.54 сөкүүндэ. Бирииһэ — 750 тыһ. солк.

Мэҥэлэр иккис сүүрүктэрэ Шугар Кид үсүһү ылла (3 мүнүүтэ 40.09 сөк). ✅Бирииһэ — 450 тыһ. солк.

Төрдүһүнэн, эмиэ мэҥэлэр быһыйдара, Талбан кэллэ. Бириэмэтэ - 3 мүнүүтэ 41,57 сөк.

Ат сүүрдүүтүн сэргээччилэргэ көмүс күһүн биир бэлиэ күнэ ити курдук бэрт сэргэхтик, интэриэһинэйдик ааста.